អតីតមេដឹកនាំបក្សប្រឆាំងថាការចោទប្រកាន់របស់តុលាការក្រុងភ្នំពេញលើប្រធានគណបក្សសង្គ្រោះជាតិ លោក កឹម សុខា គ្រាន់តែជាល្បិចឲ្យមេដឹកនាំបក្សកាន់អំណាច លោក ហ៊ុន សែន មានលេសរំលាយគណបក្សសង្គ្រោះជាតិ ដើម្បីបន្តអំណាចផ្ដាច់ការត្រកូល ហ៊ុន ប៉ុណ្ណោះ។
អតីតប្រធានគណបក្សសង្គ្រោះជាតិ លោក សម រង្ស៊ី បានសរសេរលើទំព័រ Facebook របស់លោកដោយភ្ជាប់ខ្សែវីដេអូដែលជាកិច្ចសម្ភាសន៍ជាមួយទូរទស្សន៍អាល្លឺម៉ង់ នៅថ្ងៃទី២០ ខែមករា ឆ្នាំ២០២២ នេះថា ការកាត់ទោសប្រធានគណបក្សសង្គ្រោះជាតិ លោក កឹម សុខា គ្រាន់តែជារឿងនយោបាយប៉ុណ្ណោះ មិនមែនដោយសារមេដឹកនាំបក្សប្រឆាំងរូបនេះបានប្រព្រឹត្តខុសច្បាប់ដូចការចោទប្រកាន់នោះឡើយ។
លោក សម រង្ស៊ី អះអាងថា ដើម្បីរុញច្រានប្រធានបក្សប្រឆាំង លោក កឹម សុខា ចូលក្នុងការកាត់ទោសបែបនេះបាន លោក ហ៊ុន សែន ដែលកំពុងដឹកនាំរដ្ឋាភិបាល និងរដ្ឋសភាដោយគណបក្សតែមួយ អាចធ្វើអ្វីៗស្រេចតែអំពើចិត្តដោយហ៊ានរំលោភលើឆន្ទៈពលរដ្ឋខ្មែរដែលចង់ឱ្យមានការផ្លាស់ប្ដូរស្ទើរកន្លះនគរថែមទៀត។
ការអះអាងរបស់អតីតមេដឹកនាំបក្សប្រឆាំងបែបនេះ ធ្វើឡើងបន្ទាប់ពីតុលាការក្រុងភ្នំពេញបើកសវនាការលើសំណុំរឿងប្រធានគណបក្សសង្គ្រោះជាតិ លោក កឹម សុខា ពីបទក្បត់ជាតិកាលពីថ្ងៃពុធ ទី១៩ មករា នេះ។
សកម្មជនបក្សប្រឆាំង លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី២០ មករា នេះថា នៅពេលនេះការលើកឡើងរបស់អតីតមេដឹកនាំប្រឆាំង លោក សម រង្ស៊ី គ្មានន័យខ្លឹមសារនោះទេ ព្រោះថាពេលដែលតុលាការប្រកាសរំលាយគណបក្សសង្គ្រោះជាតិ គាត់មិនប្រកាសការពារគណបក្សនោះទេ តែបែរជាជំរុញឲ្យគេរំលាយថែមទៀត។ មិនត្រឹមតែប៉ុណ្ណោះ លោក សម រង្ស៊ី បានប្រកាសឲ្យមន្ត្រីជាន់ខ្ពស់របស់ខ្លួនរត់ចោលលោក កឹម សុខា ទៀតផងនៅពេលនោះ។
សកម្មជនបក្សប្រឆាំងរូបនេះអះអាងថា ចំពោះសវនាការរបស់ប្រធានគណបក្សសង្គ្រោះជាតិ លោក កឹម សុខា បើទោះបីជានីតិវិធីនៅក្នុងអំឡុងពេលកាត់ក្តីមិនសូវរលូនក្តី ប៉ុន្តែការស្នើឲ្យពន្លឿនដំណើរការក្តីនេះ គឺមានការឯកភាពទាំងភាគីតុលាការ និងសហមេធាវីការពារក្តីរបស់លោក។
លោក ហ៊ុន កុសល អំពាវនាវឲ្យរដ្ឋាភិបាលកម្ពុជា ដែលជាភាគីដើមបណ្ដឹង និងតុលាការទម្លាក់ចោលរាល់បទចោទ និងផ្តល់សិទ្ធិសេរីភាពពេញលេញដល់លោក កឹម សុខា ឡើងវិញ ព្រោះថាការផ្តល់ជូននូវសិទ្ធិនយោបាយជូនមេដឹកនាំប្រឆាំងនេះ គឺមានផលចំណេញដល់ប្រទេសជាតិមហាសាល តាមរយៈនៃការដកសម្ពាធនានាពីសហគមន៍អន្តរជាតិ ជាដើម។ ជាងនេះទៀត លោកសង្ឃឹមថាខ្មែរត្រូវតែអាចនិយាយគ្នាបានក្នុងបុព្វហេតុប្រយោជន៍ជាតិ។
ចំណែកមន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានសរសេរលើគណនី Facebook របស់លោកនៅថ្ងៃទី២០ មករា នេះថា ការតស៊ូរបស់មេដឹកនាំបក្សប្រឆាំង លោក កឹម សុខា ដើម្បីជាតិខ្មែរ អាចនឹងត្រូវចំណាយពេលវេលាយូរបន្តិចក៏ពិតមែន ប៉ុន្តែវាដោះស្រាយវិបត្តិប្រទេសជាតិបាន។
មេដឹកនាំបក្សប្រឆាំង លោក កឹម សុខា ត្រូវអាជ្ញាធរក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ កន្លងទៅ ដោយចោទប្រកាន់ពីបទឃុបឃិតជាមួយរដ្ឋបរទេសដើម្បីផ្ដួលរំលំរដ្ឋាភិបាលកម្ពុជា តាមប្រសាសន៍មេដឹកនាំបក្សកាន់អំណាច លោក ហ៊ុន សែន។ ចាប់តាំងពីតុលាការក្រុងភ្នំពេញសម្រេចឃុំខ្លួនមេដឹកនាំបក្សប្រឆាំងកាលពីឆ្នាំ២០១៧ មក លោក កឹម សុខា ត្រូវបានសាលាដំបូងក្រុងភ្នំពេញបើកសវនាការលើសំណុំរឿងរបស់លោកចំនួន ២៦លើកហើយ។
ប៉ុន្តែនៅដើមឆ្នាំ២០២០ តុលាការកម្ពុជាសម្រេចផ្អាកសវនាការរបស់លោកក្រោមហេតុផលនៃការរីករាលដាលនៃជំងឺ Covid-19 ដូច្នេះលោក កឹម សុខា ត្រូវរង់ចាំសវនាការរបស់លោកអស់រយៈពេលប្រមាណ ២ឆ្នាំរហូតដល់ថ្ងៃទី១៩ ខែមករា ឆ្នាំ២០២២ ទើបតុលាការសម្រេចដំណើរការសវនាការរបស់លោកជាលើកដំបូងឡើងវិញ៕