ឧកញ៉ា ទ្រី ភាព ដែលល្បីឈ្មោះខាងបំផ្លាញព្រៃឈើនៅក្នុងប្រទេសកម្ពុជា ត្រូវបានព្រះមហាក្សត្រត្រាស់បង្គាប់ផ្តល់គោរមងារជា «អ្នកឧកញ៉ា» បន្ថែមទៀតកាលពីចុងឆ្នាំ២០២១ កន្លងមកនេះ។
ឧកញ៉ា ទ្រី ភាព ត្រូវបានបណ្ដាញសារព័ត៌មានអន្តរជាតិ និងអង្គការបរិស្ថានអន្តរជាតិមួយចំនួនផ្សព្វផ្សាយអំពីកេរ្តិ៍ឈ្មោះដ៏អាក្រក់ហូរហែ ពាក់ព័ន្ធការកាប់បំផ្លាញព្រៃឈើនៅកម្ពុជា ក្នុងចំណោមក្រុមឧកញ៉ាព្រៃឈើមួយចំនួនទៀតដែលមានទំនាក់ទំនងជិតស្និទ្ធជាមួយក្រុមគ្រួសាររបស់លោក ហ៊ុន សែន មេដឹកនាំគណបក្សប្រជាជនកម្ពុជា។
ក្នុងអនុក្រឹត្យចុះថ្ងៃទី០៨ ខែធ្នូ ឆ្នាំ២០២១ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់ត្រាស់បង្គាប់ផ្តល់គោរមងារជា «អ្នកឧកញ៉ា» ដល់ឧកញ៉ា ទ្រី ភាព និងភរិយា គឺឧកញ៉ា គៀង ស្រីនាង ដែលជាអគ្គនាយកក្រុមហ៊ុន MDS Group ក្រុមហ៊ុន Try Pheap Import Export រួមទាំងក្រុមហ៊ុនច្រើនទៀត។
ការត្រាស់បង្គាប់របស់ព្រះមហាក្សត្រនៃព្រះរាជាណាចក្រកម្ពុជាដោយផ្តល់គោរមងារដល់ឧកញ៉ា ទ្រី ភាព និងភរិយា ឧកញ៉ា គៀង ស្រីនាង ជា «អ្នកឧកញ៉ា» គឺតាមសេចក្តីទូលថ្វាយរបស់លោកនាយករដ្ឋមន្ត្រី ហ៊ុន សែន។
សកម្មជនបរិស្ថាន លោក ហេង ស្រស់ បង្ហាញការសោកស្ដាយដែលលោក ទ្រី ភាព ដែលជាអ្នកល្បីក្នុងការកាប់បំផ្លាញព្រៃឈើ និងបំផ្លាញធនធានធម្មជាតិនៅក្នុងប្រទេសកម្ពុជា ត្រូវបានផ្ដល់គោរមងារជា «អ្នកឧកញ៉ា» នោះ។ លោកថា រដ្ឋាភិបាល និងតុលាការគួរតែចាត់វិធានការច្បាប់លើអ្នកកាប់បំផ្លាញធនធានធម្មជាតិ និងព្រៃឈើ ជាជាងផ្ដល់គោរមងារដល់អ្នកបំផ្លាញប្រទេសជាតិ។
ជាមួយគ្នានេះ សកម្មជនបរិស្ថាន លោក ហេង ស្រស់ ក៏បានសរសេរលើបណ្ដាញសង្គម Facebook កាលពីថ្ងៃទី១៥ កុម្ភៈ ដែរថា បច្ចុប្បន្នស្ថានភាពដែនជម្រកសត្វព្រៃព្រៃឡង់ផ្នែកខាងខេត្តក្រចេះ និងខេត្តព្រះវិហារ កំពុងតែឈានចូលដំណាក់កាលប្រកាសអាសន្នហើយ បន្ទាប់ពីរដ្ឋាភិបាលកម្ពុជាហាមសកម្មជន និងអង្គការសង្គមស៊ីវិល ចុះល្បាតកាលពីពេលកន្លងមក។ លោកបានអំពាវនាវដល់មហាជន សកម្មជន អង្គការសង្គមស៊ីវិល ជាពិសេសអ្នកដែលធ្វើការពាក់ព័ន្ធ តាមដាន និងជំរុញឱ្យរដ្ឋាភិបាលដាក់ចេញវិធានការទប់ស្កាត់ បើពុំដូច្នោះទេ ព្រៃឡង់នឹងវិនាស។
កាលពីថ្ងៃទី១៤ ខែសីហា ឆ្នាំ២០០៤ ប្រមុខរដ្ឋស្ដីទី លោក ជា ស៊ីម បានចុះហត្ថលេខាលើព្រះរាជក្រឹត្យតែងតាំងលោក ទ្រី ភាព ដែលជាឈ្មួញឈើដ៏ល្បីជា «ឧកញ៉ា»។ ឧកញ៉ា ទ្រី ភាព ដែលត្រូវបានអង្គការបរិស្ថានអន្តរជាតិមួយចំនួនចាត់ទុកថាជាឧក្រិដ្ឋជនបំផ្លាញព្រៃឈើនៅកម្ពុជា ដែលមានក្រុមហ៊ុនអាជីវកម្មរកស៊ីឈើចំនួន ២១ ក្នុងនោះបានទទួលដីសម្បទានសេដ្ឋកិច្ច និងតំបន់សេដ្ឋកិច្ចពិសេសចំនួន ១៤ក្រុមហ៊ុនពីរដ្ឋាភិបាលលោក ហ៊ុន សែន ផងដែរ។
ឧកញ៉ា ទ្រី ភាព ដែលល្បីឈ្មោះបំផ្លាញព្រៃឈើនៅកម្ពុជា ត្រូវបានសហរដ្ឋអាមេរិកដាក់ទណ្ឌកម្មបង្កកទ្រព្យសម្បត្តិ និងហាមចូលទឹកដីសហរដ្ឋអាមេរិក កាលពីថ្ងៃទី២៩ ខែកក្កដា ឆ្នាំ២០២១ ជាមួយនឹងលោក ហ៊ីង ប៊ុនហៀង មេបញ្ជាការកងអង្គរក្សរបស់លោកនាយករដ្ឋមន្ត្រី ហ៊ុន សែន លោកទេសរដ្ឋមន្ត្រី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ រួមជាមួយសមាជិកគ្រួសារ ៣នាក់៕