អ្នកនាំពាក្យក្រសួងយុត្តិធម៌បដិសេធសំណើរបស់មន្ត្រីជាន់ខ្ពស់គណបក្សភ្លើងទៀន ដែលបានស្នើទៅក្រសួងយុត្តិធម៌ ឱ្យទម្លាក់ចោលបទចោទ និងការដោះលែងសកម្មជនគណបក្សភ្លើងទៀន ឱ្យនៅក្រៅឃុំ ព្រមទាំងពន្យារនីតិវិធីតុលាការកុំឱ្យមានការកោះហៅក្នុងអំឡុងពេលរៀបចំការបោះឆ្នោតឃុំ-សង្កាត់នៅខែមិថុនា ខាងមុខនេះ។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានសរសេរលើគណនីហ្វេសប៊ុករបស់លោកកាលពីថ្ងៃទី៣ ឧសភា ថា តាមគោលការណ៍ច្បាប់ ការទម្លាក់ចោលបទចោទ ឬការដោះលែងឱ្យនៅក្រៅឃុំជាសមត្ថកិច្ចរបស់តុលាការដែលជាស្ថាប័នឯករាជ្យ ដោយផ្អែកលើអង្គហេតុ និងអង្គច្បាប់។ ដោយឡែកក្រសួងយុត្តិធម៌ដែលជាស្ថាប័ននីតិប្រតិបត្តិ ពុំមានសមត្ថកិច្ច និងសិទ្ធិអំណាចក្នុងការជ្រៀតជ្រែកកិច្ចការរបស់តុលាការនោះទេ។
លោកបន្ថែមថា មានតែការចូលរួមនៅក្នុងដំណើរការនីតិវិធីរបស់តុលាការប៉ុណ្ណោះដែលជាមធ្យោបាយខាងផ្លូវច្បាប់តែមួយគត់ ក្នុងការការពារខ្លួនតាមរយៈនៃការពឹងពាក់មេធាវីដើម្បីជួយការពារក្តីនៅក្នុងដំណើរការនីតិវិធីរបស់តុលាការនោះ។
លោក ជិន ម៉ាលីន អះអាងចំពោះការស្នើសុំពន្យារនីតិវិធីតុលាការលើសកម្មជនគណបក្សភ្លើងទៀន ដែលកំពុងស្ថិតក្នុងចំណាត់ការរបស់តុលាការ ដោយកុំឱ្យមានការកោះហៅក្នុងអំឡុងពេលរៀបចំការបោះឆ្នោតឃុំ-សង្កាត់ខាងមុខនេះ ក្រសួងយុត្តិធម៌ក៏ពុំមានសមត្ថកិច្ចក្នុងការបង្គាប់បញ្ជាទៅតុលាការដូចគ្នាដែរ។
អ្នកនាំពាក្យរូបនេះបញ្ជាក់ថា ក្រសួងយុត្តិធម៌ពុំដែលណែនាំឱ្យមានការពន្យារនីតិវិធីតុលាការនោះទេ គឺមានតែផ្តល់គោលការណ៍ណែនាំឱ្យពន្លឿនដំណើរការនីតិវិធីសំណុំរឿងដោយផ្អែកទៅលើផ្លូវច្បាប់ប៉ុណ្ណោះ ដើម្បីដោះស្រាយការកកស្ទះសំណុំរឿង និងភាពចង្អៀតណែននៅតាមពន្ធនាគារ។
កាលពីថ្ងៃទី៣ ខែឧសភា ឆ្នាំ២០២២ អនុប្រធានគណបក្សភ្លើងទៀន លោក សុន ឆ័យ បានជួបជាមួយតំណាងក្រសួងយុត្តិធម៌ ដើម្បីស្នើសុំឱ្យទម្លាក់ចោលបទចោទ និងការដោះលែងសកម្មជនគណបក្សភ្លើងទៀនឱ្យនៅក្រៅឃុំ ព្រមទាំងពន្យារនីតិវិធីតុលាការកុំឱ្យមានការកោះហៅក្នុងអំឡុងពេលរៀបចំការបោះឆ្នោតឃុំ-សង្កាត់ខាងមុខនេះ ប៉ុន្តែការស្នើសុំនេះត្រូវក្រសួងយុត្តិធម៌ទាត់ចោលទាំងស្រុង។
ប៉ុន្តែមន្ត្រីជាន់ខ្ពស់គណបក្សសង្គ្រោះជាតិ លោក មុត ចន្ថា បានសរសេរលើគណនីហ្វេសប៊ុករបស់លោកកាលពីថ្ងៃទី២ ឧសភា ថា បក្សភ្លើងទៀនអាចនឹងត្រូវប្រឈមនឹងការរំលាយ ព្រោះថាមេដឹកនាំបច្ចុប្បន្នរបស់បក្សនេះសុទ្ធតែនៅជាប់បណ្តឹងនៅតុលាការ ខណៈសមាជិក និងសកម្មជននឹងត្រូវរងការធ្វើទុក្ខបុកម្នេញឥតឈប់ឈរពីអាជ្ញាធរកម្ពុជា។
ចំណែកអ្នកនាំពាក្យក្រសួងមហាផ្ទៃ លោក ខៀវ សុភ័គ ធ្លាប់បានអះអាងកាលថ្ងៃទី១៧ ខែមីនា ឆ្នាំ២០២២ កន្លងទៅថា សមត្ថកិច្ចកំពុងប្រមូលភស្តុតាងជុំវិញទំនាក់ទំនងគណបក្សភ្លើងទៀនជាមួយមេដឹកនាំគណបក្សសង្គ្រោះជាតិនៅក្រៅប្រទេស ដោយសង្ស័យថាអាចរំលោភច្បាប់ស្ដីពីគណបក្សនយោបាយ។
លោក ខៀវ សុភ័គ បញ្ជាក់ថា ថ្នាក់ដឹកនាំគណបក្សភ្លើងទៀនដឹងច្បាស់អំពីខ្លឹមសារច្បាប់ ដូច្នេះមិនគួរមានទំនាក់ទំនងជាមួយទណ្ឌិតនោះទេ ដើម្បីជៀសវាងផលវិបាកនៃការរំលាយគណបក្សនាពេលខាងមុខ៕