មន្ត្រីម្នាក់នៃក្រុមប្រឹក្សាសន្តិសុខអាមេរិក បាននិយាយថា លោកប្រធានាធិបតីសហរដ្ឋអាមេរិក ចូ បៃដិន ចាប់ផ្ដើមចាកចេញពីសេតវិមាននៅថ្ងៃព្រហស្បតិ៍ ទី១៨ ឧសភា សំដៅទៅធ្វើទស្សនកិច្ច ២ប្រទេស គឺកូរ៉េខាងត្បូង និងប្រទេសជប៉ុន។
តាមទីភ្នាក់ងារសារព័ត៌មាន AFP ទស្សនកិច្ចរបស់ប្រធានាធិបតីអាមេរិកវ័យជិត ៨០ឆ្នាំរូបនេះទៅកាន់ប្រទេសក្នុងតំបន់អាស៊ីខាងកើតពីរនេះ គឺជាលើកដំបូងបន្ទាប់ពីលោកបានក្លាយជាប្រធានាធិបតីអាមេរិក នៅថ្ងៃទី២០ ខែមករា ឆ្នាំ២០២០។
ដំណើរទស្សនកិច្ចរបស់មេដឹកនាំមហាអំណាចទីមួយនេះ ត្រូវបានអ្នកសង្កេតការណ៍មើលឃើញថា លោក បៃដិន មកបំពេញការប្ដេជ្ញាចិត្តរបស់លោកក្នុងការពង្រឹងយុទ្ធសាស្ត្ររបស់អាមេរិកនៅតំបន់ឥណ្ឌូ-ប៉ាស៊ីហ្វិក ទាំងសន្តិសុខ និងនយោបាយ។ ទស្សនកិច្ចនេះ ក្រោយពីលោក បៃដិន បានបិទបញ្ចប់ជំនួបកំពូលប្រចាំឆ្នាំជាមួយមេដឹកនាំសមាគមអាស៊ាន ៩ប្រទេស។ តែបើតាមមន្ត្រីសេតវិមាន មុនឡើងយន្តហោះទៅកាន់ទីក្រុងសេអ៊ូល និងតូក្យូ លោក បៃដិន ត្រូវជួបផ្ទាល់ជាមួយនឹងមេដឹកនាំប្រទេសហ្វាំងឡង់ និងស៊ុយអែត។
លោក បៃដិន ត្រូវបង្ហាញការស្វាគមន៍ប្រទេសពីរនេះក្លាយជាសមាជិកអង្គការយោធាណាតូ។ លោកប្រកាសធានាសន្តិសុខជូនប្រទេសពីរនេះដែលមានព្រំដែនជាប់នឹងរុស្ស៊ី។ កាលពីថ្ងៃទី១៨ ឧសភា រដ្ឋាភិបាលហ្វាំងឡង់ និងស៊ុយអែត បានជ្រើសរើសពេលតែមួយដូចគ្នាដោយបញ្ជូនពាក្យសុំចូលជាសមាជិកណាតូជាផ្លូវការ ដោយការទទួលយកពាក្យសុំនេះដោយលោកអគ្គលេខាធិការ ជេនស្តូ ស្តែនបើក។
យ៉ាងណាការចាប់អារម្មណ៍ខ្លាំងដែលលោក បៃដិន សម្រេចទៅកាន់ក្រុងសេអ៊ូល មុនក្រុងតូក្យូ គឺលោកទៅសម្ដែងការសាទរដោយផ្ទាល់ប្រធានាធិបតីថ្មីនៃសាធារណរដ្ឋកូរ៉េខាងត្បូង គឺលោក Yoon Suk-yeol ដែលទើបស្បថចូលកាន់តំណែងកាលពីថ្ងៃទី១០ ខែឧសភា បន្ទាប់ពីលោកបានឈ្នះនៅក្នុងការបោះឆ្នោតប្រធានាធិបតីកាលពីថ្ងៃទី៩ មីនា កន្លងមកនេះ។
អតីតអគ្គរដ្ឋអាជ្ញារូបនេះបានផ្ញើសារភ្លាមៗទៅកូរ៉េខាងជើងថា ក្នុងឋានៈលោកជាមេដឹកនាំកូរ៉េខាងត្បូង លោកមិនទុកឱ្យប្រទេសរបស់លោកបន្តស្ថិតនៅក្រោមការគំរាមកំហែងពីរបបកុម្មុយនីស្តក្រុងព្យុងយ៉ាង នោះទេ។ លោកសន្យាថានឹងពិនិត្យមើលដៃគូនៃក្រុមចតុភាគីហៅថា Quad ដើម្បីឱ្យកូរ៉េខាងត្បូងក្លាយជាដៃគូយុទ្ធសាស្ត្ររបស់ក្រុមយោធា ៤ប្រទេសដែលមានអាមេរិក ឥណ្ឌា ជប៉ុន និងអូស្ត្រាលី គឺធ្វើឱ្យមានតុល្យភាពសន្តិសុខជាមួយនឹងកូរ៉េខាងជើង។
តែយ៉ាងណា ទស្សនកិច្ចរបស់លោក បៃដិន ដែលស្ថិតនៅលើទឹកដីកូរ៉េខាងត្បូងដល់ទៅ ៣ថ្ងៃ ត្រូវគេរំពឹងថា លោក បៃដិន ចង់ស្ដាប់មតិរបស់សមភាគីកូរ៉េខាងត្បូង Yoon Suk-yeol ថាគាត់ត្រូវការអ្វីខ្លះពីសហរដ្ឋអាមេរិកដើម្បីជួយបន្តពង្រឹងសន្តិសុខរបស់កូរ៉េខាងត្បូង។
នៅរយៈពេលប៉ុន្មានសប្ដាហ៍មកនេះ កូរ៉េខាងជើងបានបាញ់មីស៊ីលផ្លោងជាច្រើនគ្រាប់ដែលជាការបាញ់គំរាមសម្ពន្ធមិត្តអាមេរិក គឺជប៉ុន និងកូរ៉េខាងត្បូង ស្របពេលក្រុងវ៉ាស៊ីនតោនកំពុងជាប់ដៃជួយផ្ដល់អាវុធយ៉ាងច្រើនទៅឱ្យប្រទេសអ៊ុយក្រែន ដែលធ្វើសង្គ្រាមវាយការពារទឹកដីពីសំណាក់កងទ័ពមហាអំណាចរុស្ស៊ី។ ក្នុងដំណើរទស្សនកិច្ចនេះ មានការរំពឹងថា លោក បៃដិន នឹងសួរសុខទុក្ខកងទ័ពអាមេរិកដែលមានវត្តមាននៅលើទឹកដីកូរ៉េខាងត្បូង។
ទីប្រឹក្សាសន្តិសុខជាតិអាមេរិក លោក Jake Sullivan បាននិយាយថា ភ្នាក់ងារស៊ើបការណ៍សម្ងាត់របស់អាមេរិកបានបង្ហើបពីលទ្ធភាពនៃការធ្វើតេស្ដនុយក្លេអ៊ែរ ឬមីស៊ីលរបស់កូរ៉េខាងជើង ឬក៏អាចធ្វើតេស្ដអាវុធទាំងពីរនេះតែម្ដងអំឡុងលោក ចូ បៃដិន នៅលើទឹកដីកូរ៉េខាងត្បូង និងប្រទេសជប៉ុន។
លោក Jake Sullivan បានប្រាប់សន្និសីទសារព័ត៌មាននៅឯសេតវិមានថា ភ្នាក់ងារស៊ើបការណ៍សម្ងាត់របស់អាមេរិកជឿថា កូរ៉េខាងជើងអាចនឹងធ្វើតេស្ដមីស៊ីលរយៈចម្ងាយឆ្ងាយ ឬមីស៊ីលបំពាក់ដោយគ្រាប់នុយក្លេអ៊ែរនៅថ្ងៃដែលលោក បៃដិន ជាន់ទឹកដីកូរ៉េខាងត្បូង ឬក៏នៅពេលលោកកំពុងប្រជុំជាមួយមេដឹកនាំក្រុមចតុភាគីហៅថា Quad នៅទីក្រុងតូក្យូ។
តាមលោក Jake Sullivan សេតវិមានកំពុងត្រៀមសម្រាប់គ្រប់ស្ថានការណ៍ រួមទាំងការបង្កហេតុណាមួយអំឡុងលោក បៃដិន នៅលើទឹកដីកូរ៉េខាងត្បូង ឬប្រទេសជប៉ុន។
ក្នុងជំនួបចតុភាគីនេះហើយដែលសហរដ្ឋអាមេរិកត្រូវសម្របសម្រួលយ៉ាងជិតស្និទ្ធជាមួយប្រទេសទាំង៣ គឺជប៉ុន ឥណ្ឌា និងអូស្ត្រាលី ករណីនៃការបង្កអសន្តិសុខដោយក្រុងព្យុងយ៉ាង និងត្រូវពិភាក្សាផងដែរអំពីឥទ្ធិពលចិន នៅពីក្រោយកូរ៉េខាងជើង។
ពុំមានដំណឹងណាមួយចុះផ្សាយថា លោក បៃដិន នឹងទៅពិនិត្យតំបន់គ្មានកងទ័ពនៅតាមព្រំដែនកូរ៉េខាងត្បូង និងខាងជើងដូចនឹងអតីតប្រធានាធិបតី ដូណាល់ ត្រាំ ដែលបានទៅកាន់តំបន់នោះភ្លាមៗបន្ទាប់ពីលោក ត្រាំ បានទៅដល់ទីក្រុងសេអ៊ូល គឺនៅថ្ងៃទី៣០ ខែមិថុនា ឆ្នាំ២០១៩ ដោយបានជួបផ្ទាល់នឹងលោក គីម ជុងអ៊ុន ដែលជំនួបនេះគេហៅថាជំនួប ត្រាំ និង គីម លើកទី៣។
ប៉ុន្តែទោះជាមានជំនួបបីលើកក៏ដោយ ក៏ពុំអាចបំបែកភាពទាល់ច្រកណាមួយបានដែរ ខណៈក្រុងព្យុងយ៉ាង នៅតែមិនព្រមរំលាយកម្មវិធីអាវុធនុយក្លេអ៊ែរតាមសំណើរបស់សហរដ្ឋអាមេរិកនោះទេ៕