អ្នកនាំពាក្យគណបក្សកាន់អំណាចអះអាងថា គណៈកម្មាធិការជាតិរៀបចំការបោះឆ្នោត ពិតជាត្រូវបានទទួលស្គាល់តាមផ្លូវច្បាប់ បន្ទាប់ពីគណបក្សក្រៅនយោបាយទាំង ១៧ ព្រមទទួលយកការប្រកួតប្រជែងរកសន្លឹកឆ្នោតដោយការចូលរួមយុទ្ធនាការឃោសនាកាលពីថ្ងៃទី៤ ខែឧសភា។
អ្នកនាំពាក្យគណបក្សកាន់អំណាច លោក សុខ ឥសាន ត្រូវបានសារព័ត៌មានដែលស្និទ្ធនឹងរដ្ឋាភិបាលលោក ហ៊ុន សែន គឺដើមអម្ពិល ស្រង់សម្ដីចុះផ្សាយនៅថ្ងៃទី២៤ ខែឧសភា ឆ្នាំ២០២២ នេះថា ក្រុមប្រឆាំងនៅតែបរាជ័យក្រោមដៃបក្សកាន់អំណាច ទោះពួកគេចេញមកក្នុងទម្រង់បែបណាក៏ដោយ។
លោក សុខ ឥសាន អះអាងថា គណបក្សកាន់អំណាចនៅតែមានការគាំទ្រពីពលរដ្ឋ ហើយជាការគាំទ្រភ្លូកទឹកភ្លូកដីដែលអាចយកឈ្នះលើគណបក្សប្រឆាំងទាំងអស់ ក្នុងនោះសូម្បីតែអតីតគណបក្សសង្គ្រោះជាតិ ដែលមានរូបសញ្ញាព្រះអាទិត្យ កាលពីនៅមានដង្ហើម ក៏នៅតែមិនឈ្នះបក្សកាន់អំណាចដែលមានរូបសញ្ញាទេវតាដែរ។
អ្នកនាំពាក្យរូបនេះអះអាងថា មកទល់នឹងពេលនេះ ក្រុមប្រឆាំងគ្រាន់តែជាកម្ទេចភ្លើងតូចមួយប៉ុណ្ណោះ មិនមានសមត្ថភាពអ្វីមកប្រកួតយកឈ្នះបក្សកាន់អំណាចនោះទេ។ ដូច្នេះពួកគេនឹងមិនអាចធ្វើអ្វីបានជាដុំកំភួននោះឡើយ ប៉ុន្តែគណបក្សកាន់អំណាចនៅតែជាគណបក្សដែលនឹងទទួលជោគជ័យក្នុងការបោះឆ្នោតតាមរយៈគណៈកម្មាធិការជាតិដែលកំពុងដឹកនាំរៀបចំការបោះឆ្នោតនៅពេលនេះ។
ការអះអាងនេះ ធ្វើឡើងស្របពេលដែលគណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប កំពុងរងនូវការរិះគន់ទាំងមតិជាតិ និងអន្តរជាតិ ថាជាស្ថាប័នមួយដែលបានរៀបចំដោយបក្សកាន់អំណាច។
សកម្មជនបក្សប្រឆាំង លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី២៤ ឧសភា នេះថា មន្ត្រីជាន់ខ្ពស់របស់គណៈកម្មាធិការជាតិរៀបចំការបោះឆ្នោត ឆ្នាំ២០២២ នេះ សុទ្ធតែមកពីបក្សកាន់អំណាចទាំងអស់។ ដូច្នេះអ្វីដែលលោក សុខ ឥសាន និយាយនោះគ្រាន់តែជាការប្រើប្រាស់ឈ្មោះគណបក្សចូលរួមបោះឆ្នោតទាំង ១៧ ដើម្បីបិទបាំងនូវសោកនាដកម្មដែលពួកគេបានសម្លាប់ប្រជាធិបតេយ្យនៅកម្ពុជាប៉ុណ្ណោះ។
លោក ហ៊ុន កុសល បញ្ជាក់ថា យុទ្ធសាស្ត្របំបែកបំបាក់ដើម្បីក្តោបអំណាចរបស់បក្សកាន់អំណាច គឺជារឿងដដែលៗ ប៉ុន្តែគណបក្សដែលចូលរួមបោះឆ្នោតបង្គ្រប់កិច្ចឲ្យបក្សកាន់អំណាចយកទៅប្រើប្រាស់ជាល្បែងលេងសើច នោះទើបជារឿងដែលគួរឱ្យអាម៉ាស់។
សកម្មជនបក្សប្រឆាំងរូបនេះអះអាងថា លោកមានការសោកស្តាយចំពោះគណបក្សនយោបាយទាំង១៦ ជាពិសេសគណបក្សភ្លើងទៀន ដែលចូលរួមបំបែកកម្លាំងអ្នកស្នេហាជាតិប្រជាធិបតេយ្យចេញពីគណបក្សសង្គ្រោះជាតិ តាមផែនការនយោបាយឈ្នះៗរបស់លោក ហ៊ុន សែន ដែលជាស្ពានសម្រាប់បក្សប្រជាជនកម្ពុជាឆ្ពោះទៅរកការក្តោបអំណាចបន្តទៀត ដោយវិធីមិនស្អាតស្អំ និងបំពានអ្នកតស៊ូដើម្បីលទ្ធិប្រជាធិបតេយ្យក្នុងពេលបច្ចុប្បន្ននេះយ៉ាងធ្ងន់ធ្ងរ។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានសរសេរលើគណនីហ្វេសប៊ុករបស់លោកកាលពីថ្ងៃទី២៣ ខែឧសភា នេះថា គណៈកម្មាធិការជាតិរៀបចំការបោះឆ្នោតនៅពេលនេះត្រូវគេមើលឃើញយ៉ាងច្បាស់ថា គ្រាន់តែជាអន្ទាក់នយោបាយរបស់បក្សកាន់អំណាចប៉ុណ្ណោះ។
មន្ត្រីបក្សប្រឆាំងរូបនេះលើកឡើងថា លទ្ធិប្រជាធិបតេយ្យពិតមិនអាចកើតមានបានទេ នៅពេលដែលទីលានប្រកួតនយោបាយមួយត្រូវបានបក្សកាន់អំណាចកម្ទេចតាមរបៀបមិនសុចរិតទៅហើយនោះ។ ដូច្នេះច្បាប់បោះឆ្នោត ច្បាប់ស្ដីពីគណបក្សនយោបាយ និងសមាសភាពសមាជិក គ.ជ.ប សុទ្ធសឹងតែជាបញ្ហាដែលមិនអាចបង្កលក្ខណៈឱ្យមានតម្លាភាពគួរឲ្យទុកចិត្តបានក្នុងការបោះឆ្នោតខាងមុខនេះទាំងស្រុង។
មាត្រា១៥១ថ្មី នៃរដ្ឋធម្មនុញ្ញ ចែងថា គណៈកម្មាធិការជាតិរៀបចំការបោះឆ្នោតមានសមាសភាព ៩រូប ក្នុងនោះ ៤រូបត្រូវជ្រើសដោយគណបក្សដឹកនាំរដ្ឋាភិបាល ៤រូបផ្សេងទៀតត្រូវជ្រើសរើសពីគណបក្សមានអាសនៈក្នុងរដ្ឋសភាដែលមិនចូលរួមក្នុងរដ្ឋាភិបាល ហើយ ១រូបទៀតត្រូវបានជ្រើសរើសដោយការព្រមព្រៀងគ្នារវាងគណបក្សដែលមានអាសនៈក្នុងរដ្ឋសភាទាំងអស់។
បច្ចុប្បន្ននេះ សមាសភាពទាំង ៩រូបរបស់គណៈកម្មាធិការជាតិរៀបចំការបោះឆ្នោត សុទ្ធសឹងតែមកពីគណបក្សកាន់អំណាចទាំងអស់ ក្នុងនោះរួមមានលោក ប្រាជ្ញ ច័ន្ទ ជាប្រធាន លោក នុត សុខុម ជាអនុប្រធាន និងលោក ហង្ស ពុទ្ធា ជាសមាជិក ជាដើម៕