សមត្ថកិច្ចកម្ពុជា ចុះបង្ក្រាបទីតាំងល្បែងកាស៊ីណូខុសច្បាប់មួយកន្លែងស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ឈ្មោះ Crown Entertainment ដោយឃាត់ខ្លួនជនសង្ស័យជនជាតិចិន ជនជាតិវៀតណាម និងជនជាតិខ្មែរបានចំនួន ៨៣នាក់ កាលពីយប់ថ្ងៃអង្គារ។
កម្លាំងនាយកដ្ឋានប្រឆាំងបទល្មើសល្បែងពាណិជ្ជកម្ម និងស្នងការដ្ឋាននគរបាលរាជធានីភ្នំពេញ បានបង្ក្រាបទីតាំងប្រកបអាជីវកម្មល្បែងស៊ីសងខុសច្បាប់ជាលក្ខណៈកាស៊ីណូដោយគ្មានច្បាប់អនុញ្ញាតមួយកន្លែង ដែលមានឈ្មោះថា «ការកម្សាន្តក្រោន (Crown Entertainment)» ដែលស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ឃាត់ខ្លួនបានជនជាតិចិន ១១នាក់ និងជនជាតិវៀតណាម ២នាក់ ក្រៅពីនេះគឺជាជនជាតិខ្មែរទាំងអស់។
សមត្ថកិច្ចបានដកហូតវត្ថុតាងមួយចំនួនក្រោយពីការចុះបង្ក្រាប ដូចជា ទូរហ្គេមកម្សាន្ត ទូរហ្គេមបាញ់ត្រី តុបៀបាការ៉ាត់ តុបៀនីវនីវ តុរ៉ូឡែតដៃ និងតុ POKER ផងដែរ ក្នុងនោះសមត្ថកិច្ចក៏បាននាំខ្លួនអ្នកទាំងនោះទៅកាន់នាយកដ្ឋានប្រឆាំងបទល្មើសល្បែងពាណិជ្ជកម្មផងដែរ។
ការចុះបង្ក្រាបនេះ ធ្វើឡើងបន្ទាប់ពីគណៈកម្មការគ្រប់គ្រងល្បែងពាណិជ្ជកម្មកម្ពុជាបានចេញបទបញ្ជាយ៉ាងម៉ឺងម៉ាត់ក្នុងការបង្ក្រាបល្បែងស៊ីសងខុសច្បាប់កាលពីពេលថ្មីៗនេះ។
គណៈកម្មការគ្រប់គ្រងល្បែងពាណិជ្ជកម្មកម្ពុជា បានចេញសេចក្តីណែនាំមួយស្ដីពីការធ្វើប្រតិបត្តិការល្បែងផ្សងសំណាងនៅកម្ពុជា កាលពីពេលថ្មីៗនេះថា មានភ្នាក់ងារលក់ឆ្នោតរបស់ក្រុមហ៊ុនល្បែងផ្សងសំណាង និងក្រុមជនខិលខូចមួយចំនួនបានធ្វើសកម្មភាពលួចលាក់បង្កប់លេងល្បែងស៊ីសងខុសច្បាប់ជាហូរហែ ដែលកំពុងជ្រកក្រោមអាជ្ញាបណ្ណល្បែងស៊ីសងស្របច្បាប់ និងទីតាំងក្លឹបកម្សាន្តមួយចំនួនសព្វថ្ងៃនេះ ដែលធ្វើឱ្យប៉ះពាល់យ៉ាងធ្ងន់ធ្ងរដល់សុវត្ថិភាព សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គម។
ទាក់ទិននឹងបញ្ហានេះ កាលពីថ្ងៃទី១៧ ខែកញ្ញា ឆ្នាំ២០២២ កន្លងទៅ លោក ហ៊ុន សែន ធ្លាប់ព្រមានដកតំណែងអភិបាលរាជធានី-ខេត្តណាដែលបណ្តែតបណ្តោយឱ្យមានល្បែងស៊ីសងខុសច្បាប់កើតមាននៅក្នុងមូលដ្ឋានរបស់ខ្លួនផងដែរ ប៉ុន្តែល្បែងស៊ីសងខុសច្បាប់នៅតែបន្តកើតមានរហូតដល់សព្វថ្ងៃនេះ ខណៈទីតាំងល្បែងស៊ីសងខុសច្បាប់នានាដែលបានរកឃើញ គឺមានចំនួនប្រមាណជាង ២ពាន់កន្លែងឯណោះ ដែលកំពុងដំណើរដោយលួចលាក់នៅក្នុងខេត្តកណ្តាល និងរាជធានីភ្នំពេញសព្វថ្ងៃនេះ។
ទាក់ទិននឹងបញ្ហានេះ អគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្ម លោក រស់ ភីរុណ ធ្លាប់បានលើកឡើងកាលពីអំឡុងខែកក្កដា ឆ្នាំ២០២៣ ថា ក្នុងឆមាសទី១ ឆ្នាំ២០២៣ នេះ កម្ពុជាប្រមូលចំណូលក្នុងវិស័យល្បែងពាណិជ្ជកម្មបានជាង ១០លានដុល្លារអាមេរិក កើនឡើងជាង ១០% បើធៀបនឹងការប្រមូលចំណូលក្នុងរយៈពេលដូចគ្នាកាលពីឆ្នាំ២០២២ កន្លងទៅ ហើយបច្ចុប្បន្ននេះ កម្ពុជាមានកាស៊ីណូដែលមានច្បាប់អនុញ្ញាតឲ្យធ្វើអាជីវកម្មចំនួន ១៨០កន្លែង តែកាស៊ីណូទាំងនេះមិនបានដំណើរការទាំងអស់នោះទេ។
ទីតាំងល្បែងស៊ីសងខុសច្បាប់ដែលកំពុងលួចបើកដំណើរការលួចលាក់ក្រោមស្លាកទីតាំងល្បែងស្របច្បាប់ និងក្លឹបកម្សាន្តនានានៅកម្ពុជាសព្វថ្ងៃនេះ មិនមែនមានតែក្នុងរាជធានីភ្នំពេញទេ ប៉ុន្តែបានកើតមាននៅតាមខេត្តគោលដៅសំខាន់មួយចំនួនផងដែរ ដូចជា ខេត្តកណ្តាល និងខេត្តព្រះសីហនុ ជាដើម។
ជាក់ស្តែង អគ្គលេខាធិការដ្ឋាននៃគណៈកម្មការគ្រប់គ្រងល្បែងពាណិជ្ជកម្មកម្ពុជា ក៏ធ្លាប់បង្ក្រាបអាជីវកម្មល្បែងស៊ីសងខុសច្បាប់ជ្រកក្រោមស្លាកកាស៊ីណូគ្មានច្បាប់អនុញ្ញាតផងដែរ ដែលមានឈ្មោះថា កាស៊ីណូអន្តរជាតិតោពីរ នៅសង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីចុងខែកញ្ញា ឆ្នាំ២០២៣ កន្លងទៅ។
ជុំវិញបញ្ហានេះ អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១ វិច្ឆិកា នេះថា បើចង់បង្ក្រាបល្បែងស៊ីសង ទាល់តែលោក ហ៊ុន ម៉ាណែត ហ៊ានអនុវត្តច្បាប់ចាប់សមាជិកគ្រួសារហ៊ុនដែលពាក់ព័ន្ធចូលគុក ដូចជា លោក ហ៊ុន តូ ជាដើម ព្រោះថានៅកម្ពុជា គ្មានជំនួញអបាយមុខណាមួយទាំងតូចទាំងធំ អាចដំណើរការរលូនទៅបានក្រៅក្រសែភ្នែកគ្រួសារហ៊ុនឡើយ ទោះគ្រឿងញៀន និងគ្រឿងស្រវឹងក៏ដោយ កុំថាឡើយដល់ល្បែងស៊ីសងខុសច្បាប់នោះ។
លោក គឹម សុខ អះអាងថា អ្នកដែលនៅពីក្រោយល្បែងស៊ីសងខុសច្បាប់ធំៗនៅកម្ពុជា គឺសុទ្ធសឹងតែជាបក្ខពួក និងជាសាច់ញាតិគ្រួសារត្រកូលហ៊ុនទាំងអស់ ដូចជា ក្មួយប្រុសបង្កើតលោក ហ៊ុន សែន គឺលោក ហ៊ុន តូ ជាដើម ហើយការចុះបង្ក្រាបទីតាំងល្បែងស៊ីសងខុសច្បាប់ខ្លះ គ្រាន់តែល្បិចគ្រួសារហ៊ុន ធ្វើឡើងក្នុងបំណងបិទទីតាំងល្បែងដែលពួកគេទាញយកផលចំណេញមិនបាន និងឆ្លៀតឱកាសបង្កើតព្រឹត្តិការណ៍កុហកពលរដ្ឋ ដើម្បីអួតរដ្ឋាភិបាលរបស់លោក ហ៊ុន ម៉ាណែត ក្នុងការបង្ក្រាបល្បែងស៊ីសងខុសច្បាប់ និងដើម្បីកេងចំណេញនយោបាយរបស់បក្សកាន់អំណាចផងដែរប៉ុណ្ណោះ៕