សង្គ្រាមរុស្ស៊ី ឈ្លានពានអ៊ុយក្រែន មកដល់ពេលនេះឈានចូលដល់ខែទី២១ ហើយ។ រុស្ស៊ី នៅពេលនេះ កំពុងតែវាយការពារទីតាំងរបស់ខ្លួនពីសំណាក់ការវាយបករបស់កងទ័ពអ៊ុយក្រែន។
តាមសេចក្ដីរាយការណ៍របស់ប្រភពព័ត៌មាននៃក្រសួងការពារជាតិអង់គ្លេស ឲ្យដឹងថា រយៈពេល ៦ខែដំបូង រុស្ស៊ី វាយកាន់កាប់ទឹកដីអ៊ុយក្រែន បានប្រមាណជា ៣ម៉ឺនគីឡូម៉ែត្រក្រឡា។ ប៉ុន្តែនៅពេលនេះ អ៊ុយក្រែន វាយដណ្ដើមបានមកវិញជាង ១ម៉ឺន ៦ពាន់គីឡូម៉ែត្រក្រឡា ចាប់តាំងពីអ៊ុយក្រែន រុញទ័ពរុស្ស៊ីឲ្យបាក់ទ័ពនៅខែតុលា ឆ្នាំ២០២២។
សមរភូមិដែលរុស្ស៊ី បាក់ទ័ព គឺមាននៅតំបន់ភាគឥសានប្រទេស គឺតំបន់ខាគាវ និងភាគខាងត្បូងប្រទេស គឺតំបន់ឃឺសុន។
មកដល់ពេលនេះ ប្រតិបត្តិការវាយដណ្ដើមទឹកដីពីរុស្ស៊ី មកវិញ បើរាប់ពីខែមិថុនា មកនោះ កងទ័ពអ៊ុយក្រែន វាយពង្រីកទីតាំងឈរជើងរបស់ខ្លួនដោយដណ្ដើមបានសមរភូមិយ៉ាងតិចជាង ២០សមរភូមិពីភាគីកងទ័ពរុស្ស៊ី ប៉ុន្តែប្រតិបត្តិការសឹកវាយបករបស់អ៊ុយក្រែន ត្រូវគេមើលឃើញថាមានភាពយឺតយ៉ាវ ទោះបីជាអ៊ុយក្រែន មានប្រៀបជាងកងទ័ពរុស្ស៊ី ក៏ដោយនោះ។
សារព័ត៌មានរបស់អ៊ុយក្រែន ដូចជា Defense Express បានចុះផ្សាយនូវតួលេខរបស់ក្រសួងការពារជាតិអ៊ុយក្រែន ដែលអះអាងថា រុស្ស៊ីបាត់បង់ទ័ពគិតមកដល់ថ្ងៃទី១ វិច្ឆិកា នេះ ក្នុងសង្គ្រាម ៦១៦ថ្ងៃ មហាអំណាចនេះបាត់បង់ទ័ពរបស់ខ្លួន ៣០ម៉ឺន ១៤៩០នាក់ រថក្រោះបាត់បង់ ៥២២៣គ្រឿង រថពាសដែក ៩៨៣៤គ្រឿង កាំភ្លើងធំ ៧៧៥០គ្រឿង។
យោងតាមតួលេខនេះ បញ្ជាក់ថា មហាអំណាចរុស្ស៊ី បានបាត់បង់សព្វាវុធគាំទ្រទ័ពថ្មើរជើងយ៉ាងសម្បើម ដែលចំនួននេះត្រូវបានអ្នកជំនាញមើលឃើញថា នាំឲ្យរុស្ស៊ី ធ្លាក់ចុះយ៉ាងខ្លាំងនូវឥទ្ធិពលកម្លាំងទ័ពថ្មើរជើងរបស់ខ្លួន ហើយបើនិយាយពីចំនួនទ័ពរបស់រុស្ស៊ី ដែលបាត់បង់នៅក្នុងសមរភូមិហក់ឡើងជាង ៣០ម៉ឺននាក់នេះ ក៏នាំឲ្យអ្នកជំនាញផ្នែកយោធាមើលឃើញអំពីរុស្ស៊ី ធ្លាក់ចុះយ៉ាងខ្លាំងកម្លាំងប្រយុទ្ធនៅលើសមរភូមិ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានថ្លែងថា ការវាយប្រហាររបស់អ៊ុយក្រែន លើកងទ័ពជើងទឹករុស្ស៊ី នៅសមុទ្រខ្មៅ បានធ្វើឲ្យកិច្ចខិតខំប្រឹងប្រែងធ្វើសង្គ្រាមរបស់ទីក្រុងមូស្គូ ថយចុះ ខណៈកំពុងលើកទឹកចិត្តដល់កងទ័ពរបស់លោកឱ្យប្រឹងប្រែងតស៊ូប្រយុទ្ធ។
ក្នុងសុន្ទរកថាជាវីដេអូ លោក ហ្សេឡេនស្គី បានបញ្ជាក់ថា នៅពេលដែលការឈ្លានពានចាប់ផ្តើម មនុស្សជាច្រើនមិនជឿថា អ៊ុយក្រែនអាចនឹងនៅរស់រានមានជីវិតនោះទេ។ តែយើងសូមកោតសរសើរដោយស្មោះចំពោះអ្នកដែលមិនរាថយ និងមិនចុះញ៉ម ហើយជឿជាក់លើអ៊ុយក្រែន។
លោក ហ្សេឡេនស្គី បានឲ្យដឹងទៀតថា កងទ័ពរបស់លោកកំពុងទទួលបានជោគជ័យក្នុងការកាត់បន្ថយអំណាចយោធារបស់ទីក្រុងមូស្គូ នៅសមុទ្រខ្មៅ និងនៅសមរភូមិភាគខាងកើត និងខាងត្បូង ហើយការគាំទ្រកាន់តែខ្លាំងពីសម្ព័ន្ធមិត្ត នឹងនាំទៅដល់ជ័យជម្នះទាំងស្រុងលើអ្នកឈ្លានពាន។
យ៉ាងណា នៅថ្ងៃទី១ វិច្ឆិកា នេះ ក្រសួងការពារជាតិអង់គ្លេស បញ្ជាក់ថា ក្នុងអន្តរកាលនេះ រុស្ស៊ីកំពុងតែពង្រីកកម្លាំងបន្ថែមទៀតរហូតប្រកាសកេណ្ឌស្ត្រីជាកងទ័ព ជាពិសេសយុវនារីឲ្យក្លាយជាកងទ័ពកាន់អាវុធប្រយុទ្ធនៅលើសមរភូមិ ប៉ុន្តែស្ត្រីទាំងនោះត្រូវបានរុស្ស៊ី រៀបចំឲ្យចូលទៅក្នុងក្របខ័ណ្ឌនៃក្រុមទាហានស៊ីឈ្នួល។
ក្រុមទាហានស៊ីឈ្នួលរបស់រុស្ស៊ី ការពិតគឺមានរួចទៅហើយដែលគេហៅថាក្រុម Wagner Group ហើយធ្លាប់ដឹកនាំដោយអតីតមេដឹកនាំរបស់ខ្លួន គឺលោក យេនហ្គូនី ព្រីកូហ្ស៊ីន។ តែបុរសដ៏កំណាចនេះបានបាត់បង់ជីវិតកាលពីថ្ងៃទី២៤ សីហា ដោយសារតែការផ្ទុះយន្តហោះខណៈដែលយន្តហោះនោះដឹកលោកពីទីក្រុងមូស្គូ ទៅទីក្រុងពីនស្ដូប៊ើគ ក្នុងចម្ងាយដី ៣០០គីឡូម៉ែត្រ។
មរណភាពរបស់លោក ព្រីកូហ្ស៊ីន ត្រូវបានចារកម្មអាមេរិករកឃើញថា ស្លាប់ដោយការបំផ្ទុះគ្រាប់បែករៀបចំដោយកម្លាំងសម្ងាត់របស់ប្រធានាធិបតីរុស្ស៊ី វ៉្លាឌឺមៀរ ពូទីន ក្រោមហេតុផលដែលគេថាលោក ពូទីន បញ្ជាឲ្យប្រហារជីវិតលោក ព្រីកូហ្ស៊ីន។
លោក ព្រីកូហ្ស៊ីន ដឹកនាំទ័ព Wagner Group ជាង ៨ម៉ឺននាក់ជួយច្បាំងកងទ័ពរុស្ស៊ី នៅលើទឹកដីអ៊ុយក្រែន ប៉ុន្តែចារកម្មរបស់អាមេរិកអះអាងថា ក្រុមទាហានស៊ីឈ្នួលនេះត្រូវបានសម្លាប់ក្នុងសមរភូមិដល់ទៅជាង ៥ម៉ឺននាក់ ដែលនាំឲ្យលោក ព្រីកូហ្ស៊ីន ត្រូវការទ័ពបន្ថែមទៀត។ តែយ៉ាងណា ទោះជាបាត់រូបលោក ព្រីកូហ្ស៊ីន ក៏ក្រុម Wagner Group នៅតែស្ថិតនៅក្នុងផ្នែកមួយនៃកងទ័ពរុស្ស៊ី ធ្វើសង្គ្រាមនៅលើទឹកដីអ៊ុយក្រែន។
ក្រសួងការពារជាតិអង់គ្លេស ឲ្យដឹងថា ក្រោយពីក្រុម Wagner Group បាត់បង់ទ័ពដ៏ច្រើនដូចនេះរបបក្រុងមូស្គូ បានកេណ្ឌកម្លាំងប្រយុទ្ធរបស់ខ្លួនទៅជួយក្រុមទាហានស៊ីឈ្នួលនេះ ដោយយកអ្នកទោសឧក្រិដ្ឋនៅទូទាំងប្រទេស សូម្បីអ្នកទោសស្ត្រី ក៏ទីក្រុងមូស្គូ កេណ្ឌឲ្យមកធ្វើកងទ័ពផងដែរ។
ឥឡូវនេះ ទីក្រុងមូស្គូ ប្រកាសឲ្យយុវនារីត្រូវតែស្ម័គ្រចិត្តចូលបម្រើកងទ័ព ព្រោះពេលនេះប្រទេសជាតិកំពុងតែត្រូវការកម្លាំងយុវជន។
ប្រភពចារកម្មរបស់អង់គ្លេស ឲ្យដឹងថា ស្ត្រីដែលរបបនៅក្រុងមូស្គូ លើកទឹកចិត្តផង បង្ខំផងឲ្យបម្រើកងទ័ព គឺស្ត្រីទាំងនោះភាគច្រើនរើសបានតែស្ត្រីនៅតាមជនបទតែប៉ុណ្ណោះ រីឯយុវនារីដែលកំពុងសិក្សានៅសាកលវិទ្យាល័យ ពួកគេមិនមានការស្ម័គ្រចិត្តនោះទេ។
យ៉ាងណា លោក ពូទីន អះអាងថា ទ័ពរបស់រុស្ស៊ីដែលកំពុងប្រយុទ្ធនៅលើទឹកដីអ៊ុយក្រែន មានជាង ៧០ម៉ឺននាក់ ប៉ុន្តែចារកម្មរបស់អ៊ុយក្រែន អះអាងថា ទ័ពរុស្ស៊ីនៅសល់ប្រមាណជា ៤០ម៉ឺននាក់៕