គណបក្សកម្លាំងជាតិ ស្នើឲ្យក្រសួងមហាផ្ទៃ កុំទទួលស្គាល់សំណុំឯកសាររបស់គណបក្សភ្លើងទៀន ដែលសុំផ្លាស់ប្ដូរក្រុមប្រឹក្សាឃុំ-សង្កាត់របស់ខ្លួនទៅចូលរួមជាមួយគណបក្សដទៃ ដោយបានចោទប្រកាន់ថា មេដឹកនាំនៃគណបក្សនេះអនុវត្តខុសពីជំហរដើមរបស់អតីតស្ថាបនិកបក្សភ្លើងទៀន។
បើតាមសេចក្តីថ្លែងការណ៍របស់គណបក្សកម្លាំងជាតិ ដែលចេញផ្សាយនៅថ្ងៃទី២៩ ខែមករា នេះ គណបក្សកម្លាំងជាតិ ស្នើឲ្យក្រសួងមហាផ្ទៃកុំទទួលស្គាល់សំណុំឯកសាររបស់គណបក្សភ្លើងទៀន ដែលសុំផ្លាស់ប្ដូរក្រុមប្រឹក្សាឃុំ-សង្កាត់របស់ខ្លួនទៅចូលរួមជាមួយគណបក្សដទៃ។ គណបក្សកម្លាំងជាតិ ក៏បានចោទមេដឹកនាំបក្សភ្លើងទៀនពីបទអនុវត្តខុសពីជំហរដើមរបស់អតីតស្ថាបនិកគណបក្សភ្លើងទៀនដែរ។
សេចក្តីថ្លែងការណ៍ដដែលឲ្យដឹងថា គណបក្សភ្លើងទៀនសព្វថ្ងៃបានបោះបង់គោលការណ៍ប្រជាធិបតេយ្យ សេរី ហើយបានចាប់យកជម្រើសផ្ដាច់ការ បង្ខិតបង្ខំ គំរាមកំហែង ដែលទង្វើទាំងនេះបានលាតត្រដាងឲ្យមហាជនទូទៅឃើញជាក់ស្តែង។
ប្រធានគណបក្សភ្លើងទៀនលោក ទាវ វណ្ណុល ចាត់ទុកការលើកឡើងរបស់បក្សកម្លាំងជាតិ ថាជាសិទ្ធិរបស់គេនៅក្នុងសង្គមប្រជាធិបតេយ្យ។ លោក ទាវ វណ្ណុល ក៏បានស្នើឲ្យក្រសួងមហាផ្ទៃអនុវត្តច្បាប់ស្ដីពីគណបក្សនយោបាយ និងឆ្លើយតបជាវិជ្ជមានចំពោះសំណើរបស់គណបក្សភ្លើងទៀន។
កាលពីថ្ងៃទី២២ ខែមករា កន្លងមក គណបក្សភ្លើងទៀនបានចេញសេចក្តីថ្លែងការណ៍មួយដោយបានអះអាងថា ស្ថាប័នមានសមត្ថកិច្ចមិនបានឆ្លើយតបរួសរាន់នឹងសំណើសុំផ្លាស់ប្ដូរសមាសភាពក្រុមប្រឹក្សាឃុំ-សង្កាត់ជាប់ឆ្នោតរបស់គណបក្សភ្លើងទៀន ដែលចេញទៅចូលរួមជាមួយគណបក្សផ្សេង។ គណបក្សភ្លើងទៀន សម្ដែងនូវការបារម្ភ និងខកចិត្តចំពោះការធ្វើឲ្យរាំងស្ទះក្នុងការផ្លាស់ប្ដូរ ឬដោះដូរនេះ។
សេចក្តីថ្លែងការណ៍ដដែលព្រមានថា ទង្វើរបស់អាជ្ញាធរហាក់ដូចជាមានចេតនាក្នុងការបំបាក់ស្មារតីអង្គបោះឆ្នោតដែលជាសមាជិកក្រុមប្រឹក្សាឃុំ-សង្កាត់គណបក្សភ្លើងទៀន បំពានលើមាត្រា១៦ នៃច្បាប់ស្ដីពីការគ្រប់គ្រងរដ្ឋបាលឃុំ-សង្កាត់ និងមិនស្របតាមសេចក្តីណែនាំរបស់ក្រសួងមហាផ្ទៃ។
សមាជិកក្រុមប្រឹក្សាឃុំ-សង្កាត់ចំនួន ៣២នាក់របស់គណបក្សភ្លើងទៀន ត្រូវបានគណបក្សស្នើសុំផ្លាស់ប្ដូរឈ្មោះដាក់អ្នកថ្មីជំនួសក្រុមប្រឹក្សាឃុំចាស់ ដោយសារតែសមាជិកក្រុមប្រឹក្សាចាស់ទទួលមរណភាព លាលែងពីតួនាទី អសកម្មការងារបម្រើម្ចាស់ឆ្នោត និងការចាកចេញពីគណបក្សនេះទៅចូលរួមជាមួយគណបក្សប្រជាជនកម្ពុជា។
គណបក្សភ្លើងទៀនមានក្រុមប្រឹក្សាឃុំ-សង្កាត់ជាប់ឆ្នោតរបស់ខ្លួនសរុបចំនួន ២១៩៨នាក់ ដោយសារតែគណបក្សនេះមិនមានសិទ្ធិចូលរួមបោះឆ្នោតព្រឹទ្ធសភានៅថ្ងៃទី២៥ ខែកុម្ភៈ ខាងមុខ គណបក្សភ្លើងទៀនបានជ្រើសរើសគណបក្សឆន្ទៈខ្មែរ ដែលនៅក្នុងសម្ព័ន្ធភាពជាមួយគ្នា ឲ្យឈរឈ្មោះប្រកួតប្រជែង។
ប្រធានអតីតគណបក្សសង្គ្រោះជាតិ លោក សម រង្ស៊ី នៅថ្ងៃទី១១ ខែមករា ឆ្នាំ២០២៤ កន្លងមក បានអំពាវនាវតាមរយៈហ្វេសប៊ុករបស់លោកថា តំណាងកម្លាំងប្រជាធិបតេយ្យទាំងអស់នៅប្រទេសកម្ពុជា ត្រូវចេះរួបរួមគ្នា ហើយសហការគ្នាដើម្បីលើកកម្ពស់លទ្ធិប្រជាធិបតេយ្យនៅក្នុងស្រុក។ លោកអំពាវនាវកុំឲ្យមានការវាយប្រហារគ្នាទៅវិញទៅមក ហើយត្រូវតែចែកតួនាទីគ្នាដើម្បីទទួលបានជ័យជម្នះរួម។
លោក សម រង្ស៊ី បានលើកឡើងថា នៅពេលនេះមានគណបក្សនយោបាយបីដែលតំណាងឲ្យកម្លាំងប្រជាធិបតេយ្យ ហើយដែលមានអ្នកគាំទ្រចេញមកពីប្រភពដើមតែមួយ គឺគណបក្សភ្លើងទៀន គណបក្សកម្លាំងជាតិ និងគណបក្សឆន្ទៈខ្មែរ។ លោកសូមឲ្យអ្នកគាំទ្រ និងសកម្មជននៃគណបក្សទាំងបីនេះ រក្សាភាពស្មោះត្រង់ចំពោះប្រទេសជាតិ និងប្រជារាស្ត្រ មានន័យថារក្សាឧត្តមគតិដើមរបស់ទាំងអស់គ្នាឈរលើសីលធម៌ សច្ចធម៌ យុត្តិធម៌។
លោក សម រង្ស៊ី អះអាងថា ក្នុងការបោះឆ្នោតជ្រើសរើសសមាជិកព្រឹទ្ធសភានៅថ្ងៃទី២៥ ខែកុម្ភៈ ឆ្នាំ២០២៤ ត្រូវតែមានការសហការគ្នារវាងគណបក្សកម្លាំងជាតិ និងគណបក្សឆន្ទៈខ្មែរ ដោយចៀសវាងការប្រកួតប្រជែងគ្នានៅតាមភូមិភាគនីមួយៗ។ បើគណបក្សទាំងពីរនេះប្រកួតប្រជែងគ្នានៅក្នុងភូមិភាគណាមួយ គឺគណបក្សទាំងពីរច្បាស់ជាបរាជ័យទាំងពីរ៕