ក្រសួងការងារ កំពុងសហការជាមួយអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ អាជ្ញាធរដែនដី និងអង្គភាពពាក់ព័ន្ធ ដើម្បីសម្របសម្រួលការចេញចូលរបស់ពលករខ្មែរនៅតាមព្រំដែនកម្ពុជា-ថៃ និងតាមច្រកទ្វារនានាក្នុងអំឡុងពេលបុណ្យចូលឆ្នាំខ្មែរខាងមុខ ខណៈអាជ្ញាធរថៃ បានបើកឲ្យពលករខ្មែរដែលគ្រោងត្រឡប់ទៅចូលរួមបុណ្យចូលឆ្នាំថ្មី អាចត្រឡប់ចូលទៅធ្វើការនៅប្រទេសថៃ វិញក្នុងរយៈពេល ១ខែកន្លះចាប់ពីថ្ងៃទី០១ ខែមេសា ដល់ថ្ងៃទី១៥ ខែឧសភា ឆ្នាំ២០២៤ ដោយមិនចាំបាច់មានលិខិតអនុញ្ញាត។
រដ្ឋលេខាធិការ និងជាអ្នកនាំពាក្យក្រសួងការងារ លោក កត្តា អ៊ន បានឲ្យដឹងថា ក្រុមការងារក្រសួងការងារកម្ពុជា នឹងចុះទៅតាមបណ្តាខេត្តជាប់ព្រំដែនកម្ពុជា-ថៃ និងតាមច្រកទ្វារនានា ដើម្បីពិនិត្យមើលស្ថានភាព និងត្រៀមរៀបចំស្វាគមន៍ឲ្យបានល្អបំផុតដល់ពលករខ្មែរដែលចេញចូលប្រទេសទាំងពីរ។
ប្រភពដដែលអះអាងថា ក្រសួងការងារកំពុងសហការជាមួយអគ្គនាយកដ្ឋានអន្តោប្រវេសន៍ ក្រសួងមហាផ្ទៃ អាជ្ញាធរដែនដី និងអង្គភាពពាក់ព័ន្ធ ដើម្បីសម្របសម្រួលការចេញចូលរបស់ពលករខ្មែរនៅតាមព្រំដែនក្នុងអំឡុងបុណ្យចូលឆ្នាំខ្មែរខាងមុខ។
កាសែតថៃនានា កាលពីចុងសប្តាហ៍មុនបានឲ្យដឹងថា ក្រសួងការងារថៃ នៅថ្ងៃទី១៦ ខែមីនា បានអះអាងថា ពលករកម្ពុជា ឡាវ និងមីយ៉ាន់ម៉ា អាចត្រឡប់ទៅថៃ ធ្វើការវិញ ក្រោយចប់ពិធីចូលឆ្នាំប្រពៃណី ដោយមិនតម្រូវឱ្យមានការបង់ប្រាក់សម្រាប់ការអនុញ្ញាតចូលវិញ (Re-entry permit) ដោយផ្តើមពីថ្ងៃទី១ ខែមេសា ដល់ថ្ងៃទី១៥ ខែឧសភា ប៉ុន្តែការលើកចោលការបង់ប្រាក់សម្រាប់ការអនុញ្ញាតចូលវិញ ត្រូវរង់ចាំការផ្តល់ភ្លើងបៃតងពីគណៈរដ្ឋមន្ត្រីថៃ ជាមុនសិន។
អ្នកនាំពាក្យរងរបស់ក្រសួងការងារថៃ លោក Karom Phonphonklang បានអះអាងថា ថៃអាចលុបចោលការបង់ប្រាក់សម្រាប់ការអនុញ្ញាតចូលថៃវិញចាប់ពីថ្ងៃទី១ ខែមេសា ដល់ថ្ងៃទី១៥ ខែឧសភា ដើម្បីសម្រួលដល់ការធ្វើដំណើរ និងការចំណាយរបស់ពលករនៃប្រទេសជិតខាង ដូចជាកម្ពុជា ឡាវ និងមីយ៉ាន់ម៉ា ដែលជាកម្លាំងសំខាន់ក្នុងសេដ្ឋកិច្ចថៃ។
អ្នកនាំពាក្យខាងលើបានអះអាងថា ការលើកចោលការអនុញ្ញាតចូលវិញខាងលើ ធ្វើឡើងសម្រាប់ពលករកម្ពុជា ឡាវ និងមីយ៉ាន់ម៉ា ដែលកាន់លិខិតឆ្លងដែនជាមួយទិដ្ឋាការប្រភេទ non-L-A ប៉ុណ្ណោះ ដោយសារវាមានសុពលភាពលើសពីថ្ងៃទី១៥ ខែឧសភា។ ចំណែកកូនៗក្រោមអាយុ ១៨ឆ្នាំរបស់ពលករ ដែលកាន់លិខិតឆ្លងដែនប្រភេទនេះ ក៏ត្រូវបានអនុវត្តផងដែរ។
ក្នុងឱកាសអញ្ជើញជាអធិបតីភាពបើកពិធីបុណ្យទន្លេលើកទី៨ នៅក្នុងខេត្តសៀមរាប នៅព្រលប់ថ្ងៃទី១៦ ខែមីនា ឆ្នាំ២០២៤ លោក ហ៊ុន ម៉ាណែត បានណែនាំឱ្យក្រសួងការងារ និងបណ្តុះបណ្តាលវិជ្ជាជីវៈ សហការជាមួយអគ្គនាយកដ្ឋានអន្តោប្រវេសន៍ និងអាជ្ញាធរខេត្តជាប់ព្រំដែន ត្រូវត្រៀមរៀបចំស្វាគមន៍ពលករខ្មែរដែលត្រឡប់មកពីថៃ ដើម្បីមកលេងស្រុកកំណើតក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ។
លោក ហ៊ុន ម៉ាណែត បញ្ជាក់ថា លោកបានចរចាជាមួយនាយករដ្ឋមន្ត្រីរបស់ថៃ កាលពីអំឡុងពេលលោកអញ្ជើញទៅបំពេញបេសកកម្មនៅប្រទេសថៃ ដោយភាគីថៃ បានឯកភាពឱ្យពលករខ្មែរដែលមកលេងស្រុកកំណើតក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ គឺមិនតម្រូវឱ្យបង់ប្រាក់នោះទេ។
យ៉ាងណាក៏ដោយ គេនៅមិនទាន់ដឹងថា នៅក្នុងចំណោមពលករទេសន្តរប្រវេសន៍ខ្មែរជាង ១លាននាក់ដែលកំពុងធ្វើការនៅក្នុងប្រទេសថៃ តើនឹងមានប៉ុន្មាននាក់ដែលចង់ទៅចូលរួមបុណ្យចូលឆ្នាំប្រពៃណីជាតិនៅក្នុងប្រទេសកំណើតរបស់ខ្លួននោះទេ។
ប្រទេសក្នុងតំបន់អាស៊ានចំនួន៤ គឺកម្ពុជា ថៃ ឡាវ និងភូមា ប្រារព្ធពិធីបុណ្យចូលឆ្នាំថ្មីក្នុងពេលតែមួយដូចគ្នារយៈពេល ៣ ឬ ៤ថ្ងៃ នៅក្នុងខែមេសា រៀងរាល់ឆ្នាំ។ យោងតាមប្រតិទិនឈប់សម្រាកចូលឆ្នាំប្រពៃណីជាតិខ្មែរ ឆ្នាំរោង ឆស័ក នឹងប្រព្រឹត្តទៅពីថ្ងៃទី១៣ រហូតដល់ថ្ងៃទី១៦ ខែមេសា ឆ្នាំ២០២៤ ដែលមាន ៤ថ្ងៃ ចាប់ពីថ្ងៃអាទិត្យ ដល់ថ្ងៃអង្គារ៕