 បានត្រឡប់ទៅប្រទេសចិន ជាថ្មីទៀត ដែលអ្នកសង្កេតការណ៍ហៅថាដំណើរទៅជួបសមមិត្ត សំដៅពង្រឹងសម្ពន្ធភាពកាន់តែស៊ីជម្រៅ និងគ្រប់ជ្រុងជ្រោយនៃទំនាក់ទំនងទ្វេភាគី ខណៈលោក ពូទីន កំពុងតែដឹកនាំកម្លាំងនយោបាយ និងកងទ័ពវាយពង្រីកទឹកដីនៅក្នុងសង្គ្រាមឈ្លានពានប្រទេសអ៊ុយក្រែន។){kind=link}
ប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin) បានត្រឡប់ទៅប្រទេសចិន ជាថ្មីទៀត ដែលអ្នកសង្កេតការណ៍ហៅថាដំណើរទៅជួបសមមិត្ត សំដៅពង្រឹងសម្ពន្ធភាពកាន់តែស៊ីជម្រៅ និងគ្រប់ជ្រុងជ្រោយនៃទំនាក់ទំនងទ្វេភាគី ខណៈលោក ពូទីន កំពុងតែដឹកនាំកម្លាំងនយោបាយ និងកងទ័ពវាយពង្រីកទឹកដីនៅក្នុងសង្គ្រាមឈ្លានពានប្រទេសអ៊ុយក្រែន។
ទៅដល់ប្រទេសចិន កាលពីថ្ងៃទី១៦ ឧសភា ក្នុងដំណើរទស្សនកិច្ច ២ថ្ងៃ លោក ពូទីន ទទួលបានការធ្វើបដិសណ្ឋារកិច្ចយ៉ាងរាក់ទាក់ពីលោក ស៊ី ជីនពីង ប្រធានាធិបតីចិន។
លោក ស៊ី ជីនពីង បានស្វាគមន៍លោក ពូទីន ដោយដំណើរមួយៗលើកម្រាលព្រំក្រហមនៅខាងក្រៅមហាសាលប្រជាជនក្នុងទីក្រុងប៉េកាំង ជាទីដែលមេដឹកនាំពីររូបនេះត្រូវបានស្វាគមន៍ដោយកងទ័ពរំដោះប្រជាជនចិន។
ការស្វាគមន៍ដោយកងកិត្តិយសជាតិនៅទីលានធានអានមេន ដោយមានកងកុមារគ្រវីទង់ជាតិចិន និងរុស្ស៊ី ចម្រុះគ្នា។
បើតាមសារព័ត៌មាន Asia Financial លោក ពូទីន ទៅប្រទេសចិន ជាលើកទី២ នេះ ក្នុងរយៈពេលមិនដល់ ៦ខែផង គឺជាការពង្រឹងសម្ពន្ធភាពនៃប្រទេសមហាអំណាចពីរនេះដែលទំនាក់ទំនងការទូតមានអាយុកាល ៧៥ឆ្នាំ គឺច្រើនជាងវ័យរបស់បុរសខ្លាំងពីររូបនេះទៅទៀត។
លោក ស៊ី មានវ័យ ៧០ឆ្នាំ និងលោក ពូទីន មានវ័យ ៧១ឆ្នាំ។ មេដឹកនាំទាំងពីរបានចុះហត្ថលេខាលើសេចក្តីថ្លែងការណ៍រួមមួយកាលពីថ្ងៃព្រហស្បតិ៍ ទី១៦ ឧសភា ដែលសេចក្ដីថ្លែងការណ៍នេះចារថា «សករាជថ្មីនៃសម្ពន្ធភាពទ្វេភាគី»។
ប៉ុន្តែសារព័ត៌មាន Asia Financial ធ្វើសេចក្ដីរាយការណ៍ថា សេចក្ដីថ្លែងការណ៍រួមរបស់មេដឹកនាំប្រទេសមហាអំណាចទាំងពីរ បានប្រកាសប្រឆាំង និងថ្កោលទោសសហរដ្ឋអាមេរិកលើបញ្ហាសន្តិសុខសកល ដែលរាប់បញ្ជូនតាំងពីបញ្ហាកោះតៃវ៉ាន់ សង្គ្រាមនៅអ៊ុយក្រែន ស្ថានភាពតានតឹងនៅឧបទ្វីបកូរ៉េ និងបញ្ហាអាវុធនុយក្លេអ៊ែរ។
ប្រទេសចិន និងរុស្ស៊ី បានប្រកាសពីភាពជាដៃគូ «គ្មានព្រំដែន» កាលពីខែកុម្ភៈ ឆ្នាំ២០២២ នៅពេលដែលលោក ពូទីន បានធ្វើទស្សនកិច្ចនៅទីក្រុងប៉េកាំង ប៉ុន្មានថ្ងៃ មុននឹងលោក ពូទីន បញ្ជាឱ្យលើកទ័ព ២៥ម៉ឺននាក់ដំបូងវាយចូលរដ្ឋធានីគៀវ ដើម្បីទាញទម្លាក់លោក វូឡូឌីមៀ ហ្សេឡេនស្គី ពីប្រធានាធិបតីអ៊ុយក្រែន ដែលនាំឱ្យផ្ទុះសង្គ្រាមប្រយុទ្ធគ្នាមកដល់ពេលនេះមានរយៈពេល ២ឆ្នាំជិត ៣ខែហើយ។
សង្គ្រាមនៅអ៊ុយក្រែន ដែលជាការឈ្លានពានរបស់រុស្ស៊ី ចាប់ផ្ដើមតាំងពីថ្ងៃទី២៤ ខែកុម្ភៈ ឆ្នាំ២០២២ ដែលអ្នកសង្កេតការណ៍ហៅថាជាសង្គ្រាមពង្រីកទឹកដី និងបង្កើនអនុត្តរភាពរបស់ក្រុងមូស្គូ។ ពិភពលោក រួមទាំងសហរដ្ឋអាមេរិក និងបស្ចិមប្រទេសជាកម្លាំងប្រជាធិបតេយ្យ បានរួមគ្នាថ្កោលទោសរុស្ស៊ី ហើយជំរុញឱ្យរបបនៅក្រុងមូស្គូ ដកទ័ពចេញពីអ៊ុយក្រែន។
តែសម្រាប់ក្រុងប៉េកាំង មិនត្រឹមតែមិនចូលរួមថ្កោលទោសរុស្ស៊ី នោះទេ ក៏មិនចូលរួមជាមួយក្រុមបស្ចិមប្រទេសដាក់ទណ្ឌកម្មពាណិជ្ជកម្មលើរុស្ស៊ី ផងដែរ។
នៅគ្រប់វេទិកាអន្តរជាតិទាំងអស់ រួមទាំងនៅឯកិច្ចប្រជុំនៃក្រុមប្រឹក្សាសន្តិសុខអង្គការសហប្រជាជាតិ រួមនឹងមហាសន្និបាតរបស់ស្ថាប័នពិភពលោកមួយនេះ ក៏ក្រុងប៉េកាំង មិនបានប្រើសន្លឹកឆ្នោតបោះឆ្នោតថ្កោលទោសក្រុងមូស្គូ ម្ដងណានោះទេ។ ផ្ទុយទៅវិញ ចិនកាន់តែធ្វើខ្លួនឱ្យស្និទ្ធនឹងរុស្ស៊ី ក្នុងទំនាក់ទំនងយោធារវាងប្រទេសទាំងពីរ។
នៅក្នុងជំនួបកំពូល លោក ស៊ី ជីនពីង បានប្រាប់លោក ពូទីន ថា ទំនាក់ទំនងចិន-រុស្ស៊ី នាពេលបច្ចុប្បន្ននេះ គឺពិបាករកបាន ហើយភាគីទាំងពីរត្រូវតែស្រឡាញ់ និងចិញ្ចឹមបីបាច់ថែរក្សាទំនាក់ទំនងជាមួយគ្នាកាន់តែរឹងមាំថែមទៀត។
លោក ស៊ី ជីនពីង និងលោក ពូទីន មានទំនុកចិត្តខ្លាំងលើសម្ពន្ធភាពនឹងគ្នានេះ សំដៅទប់ទល់ឥទ្ធិពលសហរដ្ឋអាមេរិក និងបស្ចិមប្រទេស ដែលពេលនេះពិភពលោកកំពុងទាញចូលក្នុងសករាជថ្មី គឺសង្គ្រាមត្រជាក់ដែលជំនួសសម័យសហភាពសូវៀត ឱ្យមកចូលបរិបទថ្មីនៃការប្រជែងគ្នារវាងមហាអំណាចអឺរ៉ុបដឹកនាំដោយសហរដ្ឋអាមេរិក និងមហាអំណាចអាស៊ីដឹកនាំដោយប្រទេសចិន ដែលរួមជាមួយសហព័ន្ធរុស្ស៊ី ជាសម្ពន្ធភាពគ្មានព្រំដែន។
ប្រធានាធិបតីសហរដ្ឋអាមេរិក លោក ចូ បៃដិន ដែលតំណាងឱ្យកម្លាំងអ្នកប្រជាធិបតេយ្យពិភពលោក បានហៅលោក ស៊ី ជីនពីង ថាជាជនផ្ដាច់ការតំណាងប្រទេសកុម្មុយនីស្តចិនផ្ដាច់ការ ហើយលោក ពូទីន គឺជានិមិត្តរូបនៃប្រទេសដែលស្ថិតនៅក្រោមប្រព័ន្ធផ្ដាច់ការនិយម។ តែលោក បៃដិន បានហៅលោក ពូទីន គឺជាឃាតករដែលលើកទ័ពបង្កឱ្យផ្ទុះសង្គ្រាមនៅអ៊ុយក្រែន។ បន្ថែមលើសពីនេះ លោក បៃដិន បានហៅប្រទេសមហាអំណាចទាំងពីរនេះថាកំពុងបំផ្លាញពិភពលោកទៀតផង៕