លោក Jens Stoltenberg អគ្គលេខាធិការនៃអង្គការសន្ធិសញ្ញាអាត្លង់តិកខាងជើង ហៅកាត់ថា ណាតូ (NATO) ឬសម្ព័ន្ធភាពយោធាណាតូ បាននិយាយនៅថ្ងៃពុធ ទី១២ មិថុនា នេះថា រដ្ឋាភិបាលនៃនាយករដ្ឋមន្ត្រី Viktor Orban ប្រទេសហុងគ្រី សម្រេចចិត្តថាលែងប្រើសិទ្ធិបោះឆ្នោតជំទាស់ក្នុងការផ្ដល់ជំនួយយោធារបស់អង្គការណាតូ ដែលត្រូវគាំទ្រអ៊ុយក្រែន ក្នុងការតស៊ូប្រយុទ្ធប្រឆាំងនឹងសង្គ្រាមឈ្លានពានពីសំណាក់ប្រទេសរុស្ស៊ី។
តែបើតាមលោកអគ្គលេខាធិការណាតូរូបនេះ រដ្ឋាភិបាលលោកនាយករដ្ឋមន្ត្រី Viktor Orban មិនចូលរួមផ្ដល់មូលនិធិសម្រាប់ជំនួយយោធាពីប្រទេសហុងគ្រី ទៅឱ្យអ៊ុយក្រែន នោះទេ។ នេះបើតាមការចុះផ្សាយពីទីភ្នាក់ងារព័ត៌មាន AP ដែលបានធ្វើសេចក្ដីរាយការណ៍នៅថ្ងៃទី១២ មិថុនា នេះ។
អង្គការណាតូ នឹងបើកកិច្ចប្រជុំកំពូលដែលមានសមាជិក ៣២ប្រទេស ត្រូវធ្វើនៅខែកក្កដា នាទីក្រុងវ៉ាស៊ីនតុន នាខែក្រោយនេះ។ ក្នុងឱកាសនោះ លោកប្រធានាធិបតីសហរដ្ឋអាមេរិក ចូ បៃដិន និងសមភាគីណាតូ ត្រូវស្នើឱ្យមានកិច្ចព្រមព្រៀងថ្មីមួយអំពីការបង្កើតកម្មវិធីសន្តិសុខរយៈពេលយូរជាមួយប្រទេសអ៊ុយក្រែន ដែលក្នុងនោះមានការបញ្ជាក់ពីការផ្ដល់ជំនួយយោធា និងការហ្វឹកហាត់កងទ័ពបម្រុងនៃប្រទេសអ៊ុយក្រែន។ ប៉ុន្តែប្រទេសហុងគ្រី នឹងមិនចូលរួមការខិតខំប្រឹងប្រែងទាំងឡាយណារបស់ណាតូ ចំពោះប្រទេសអ៊ុយក្រែន នោះទេ។
លោក Jens Stoltenberg បានបញ្ជាក់ដូចនេះពេលលោកបានជួបពិភាក្សាជាមួយនាយករដ្ឋមន្ត្រីហុងគ្រី លោក Viktor Orban។
តាមលោក Stoltenberg រូបលោក និងលោក Orban បានព្រមព្រៀងគ្នាដែលថាចំពោះហុងគ្រី មិនចូលរួមជួយវិភាគទានណាមួយទៅអ៊ុយក្រែន តាមរយៈណាតូ ឬមិនជួយផ្ទាល់តែម្ដង គឺជារឿងរបស់ប្រទេសហុងគ្រី តែចំពោះសំឡេងគាំទ្រភាគច្រើនហើយនោះ គឺហុងគ្រី ក៏មិនប្រើសិទ្ធិវេតូទៀតដែរ។
នៅពេលជាមួយគ្នានេះ នាយករដ្ឋមន្ត្រីហុងគ្រី សន្យាលែងជំទាស់នូវការខិតខំប្រឹងប្រែងដែលឆ្ពោះទៅរកប្រទេសអ៊ុយក្រែន ព្រោះថាគឺការប្ដេជ្ញារបស់ប្រទេសសមាជិកណាតូ។ នេះបើតាម លោក Stoltenberg។
តាមលក្ខន្តិកៈនៃធម្មនុញ្ញអង្គការណាតូ ការសម្រេចណាមួយអាចធ្វើបាន លុះត្រាតែមានសំឡេងស្រុះគ្នាទាំង ៣២ប្រទេស ហើយបើមានប្រទេសណាមួយវេតូ នឹងជាប់គាំងការសម្រេចចិត្តរបស់ណាតូទាំងស្រុង។
ហុងគ្រី ជាប្រទេសចុងក្រោយគេដែលសម្រេចឱ្យប្រទេសហ្វាំងឡង់ និងស៊ុយអែត ចូលជាសមាជិកណាតូ ប៉ុន្តែហុងគ្រី យល់ព្រមដូចនេះក្រោយពីមេដឹកនាំណាតូ ដែលមានឥទ្ធិពលដូចជាសហរដ្ឋអាមេរិក អង់គ្លេស អាល្លឺម៉ង់ បារាំង ហុឡង់ដ៍ កាណាដា បែលហ្សិក ប៉ូឡូញ ព្រមានខ្លាំងៗ ទើបប្រទេសហុងគ្រី ដូរឥរិយាបថ ហើយគាំទ្រឱ្យប្រទេសហ្វាំងឡង់ និងស៊ុយអែត ក្លាយជាសមាជិកថ្មីទី៣១ និង៣២ ក្នុងអង្គការណាតូ។
ក្នុងពេលជាមួយគ្នានេះដែរ ទីភ្នាក់ងារព័ត៌មាន Reuters បានឱ្យដឹងថា លោក Tamas Sulyok ប្រធានាធិបតីនៃប្រទេសហុងគ្រី មិនទៅចូលរួមកិច្ចប្រជុំកំពូល Bucharest Nine ដែលជាក្រុមប្រទេសអឺរ៉ុប នៅប៉ែកខាងកើតនៃអង្គការណាតូ ក្នុងរដ្ឋធានី Riga នៅប្រទេសឡាតវី នោះទេ។
តាមក្រឹត្យក្រមទម្លាប់នៃក្រុមប្រទេស Bucharest Nine ប្រធានាធិបតីនៃប្រទេសប៊ុលហ្គារី សាធារណរដ្ឋឆេក អេស្តូនី ហុងគ្រី ឡាតវី លីទុយអានី ប៉ូឡូញ រូម៉ានី និងស្លូវ៉ាគី តែងតែមានវត្តមាននៅក្នុងកិច្ចប្រជុំកំពូលប្រចាំឆ្នាំនៃប្រទេសទាំង ៩ នៅអឺរ៉ុបខាងកើត ហើយសុទ្ធសឹងតែជាសមាជិកណាតូ។ តែយ៉ាងនេះក្តី រដ្ឋាភិបាលនាយករដ្ឋមន្ត្រី Viktor Orban នៃប្រទេសហុងគ្រី បានចាត់ឱ្យឯកអគ្គរដ្ឋទូតរបស់ខ្លួនប្រចាំនៅប្រទេសឡាតវី ធ្វើជាអ្នកតំណាងជំនួសលោកប្រធានាធិបតី Tamas Sulyok។ ការិយាល័យប្រធានាធិបតី បានឱ្យដឹងថា កិច្ចប្រជុំកំពូលនេះ ក៏នឹងមិនបញ្ចប់ទៅជាមួយនឹងសេចក្តីថ្លែងការណ៍រួមរវាងប្រទេសទាំង ៩ នេះដែរ។
ប៉ុន្តែអ្នកនាំពាក្យការិយាល័យប្រធានាធិបតីឡាតវី លោក Edgars Rinkevics បានប្រាប់ទីភ្នាក់ងារព័ត៌មាន Reuters ថា សេចក្តីថ្លែងការណ៍រួម នឹងអាចចេញបាន ទោះជាប្រធានាធិបតីឡាតវី មិនចូលរួមក៏ដោយ គឺសេចក្តីថ្លែងការណ៍មួយតាងនាមឱ្យប្រទេសរូម៉ានី និងប៉ូឡូញ ដែលរួមគ្នាធ្វើជាម្ចាស់ផ្ទះនៃកិច្ចប្រជុំនេះ។
ហុងគ្រី កំពុងស្ថិតក្នុងការទាស់ទែងគ្នាជុំវិញការបន្តទំនាក់ទំនងជិតស្និទ្ធជាមួយរុស្ស៊ី ដោយនាយករដ្ឋមន្ត្រីហុងគ្រី លោក Viktor Orban ដែលក្រុមប្រឆាំងបន្តដាក់សម្ពាធទៅលើរដ្ឋាភិបាលរបស់លោក Viktor Orban ឱ្យបញ្ឈប់ការរាំងខ្ទប់ការផ្តល់ជំនួយទៅឱ្យប្រទេសអ៊ុយក្រែន។ ប្រទេសហុងគ្រី ក្រោមការដឹកនាំរបស់លោក Viktor Orban ព្យាយាមចងសម្ព័ន្ធភាពជាមួយលោកប្រធានាធិបតីរុស្ស៊ី តាមរយៈទំនាក់ទំនងទាំងសម្ងាត់ ទាំងបើកចំហជួបនឹងលោក វ៉្លាឌីមៀ ពូទីន។
ឧទាហរណ៍ជាក់ស្ដែងនៅឯវេទិកាសេដ្ឋកិច្ចអន្តរជាតិមួយធ្វើឡើងនៅប្រទេសចិន កាលពីប៉ុន្មានខែមកនេះ ដែលក្នុងវេទិកានេះក៏មានវត្តមានលោក ពូទីន ផងដែរ គឺពេលនោះ លោក Orban បានជួបផ្ទាល់នឹងលោក ពូទីន ខណៈមេដឹកនាំអឺរ៉ុបដែលទៅចូលរួមវេទិកានោះដែរ មិនបានណាត់ជួបលោក ពូទីន នោះទេ។
ប្រទេសហុងគ្រី ដែលមានលោក Viktor Orban ជានាយករដ្ឋមន្ត្រី នៅបន្តមានទំនាក់ទំនងជាមួយរុស្ស៊ី ហើយកាន់តែធ្វើឱ្យរឹងមាំជាមួយប្រទេសចិន ដែលក្រុមបស្ចិមប្រទេសកំពុងដាក់ទម្ងន់ទៅលើក្រុងប៉េកាំង ឱ្យឈប់ជួយរុស្ស៊ី ជាពិសេសការផ្ដល់បច្ចេកទេសយោធាទៅឱ្យរុស្ស៊ី ទោះជាក្រុងប៉េកាំង អះអាងថាវាគឺជាសិទ្ធិរបស់ក្រុមហ៊ុនចិននៅក្រៅប្រទេសក៏ដោយ៕