ពលករខ្មែរធ្វើការនៅប្រទេសថៃ ជិត ៤ពាន់នាក់ ត្រូវបានអាជ្ញាធរថៃ ចាប់ខ្លួនត្រឹមតែរយៈពេល ១សប្តាហ៍កាលពីដើមខែមិថុនា នេះ ក្នុងយុទ្ធនាការបង្ក្រាបពលករបរទេសខុសច្បាប់ ១២០ថ្ងៃរបស់រដ្ឋាភិបាលថៃ ដោយសារតែពលករខ្មែរទាំងនោះមិនមានឯកសារត្រឹមត្រូវ។
យោងតាមកាសែត The Nation របស់ថៃ ចុះផ្សាយកាលពីថ្ងៃទី១៧ ខែមិថុនា ឆ្នាំ២០២៤ នេះថា នាយកដ្ឋានការងារថៃ បានប្រកាសថា ពលករបរទេសដែលចូលទៅធ្វើការក្នុងប្រទេសថៃ ដោយគ្មានឯកសារស្របច្បាប់មានចំនួនជាង ២ម៉ឺននាក់ (២៦០០០នាក់) ដែលមកពីប្រទេសភូមា ឡាវ កម្ពុជា និងវៀតណាម ខណៈពលករខុសច្បាប់កម្ពុជា គឺមានចំនួន ៣៩៧១នាក់ផងដែរ។
ប្រភពដដែលលើកឡើងថា ក្នុងយុទ្ធនាការបង្ក្រាបពលករបរទេសខុសច្បាប់រយៈពេល ១២០ថ្ងៃរបស់រដ្ឋាភិបាលថៃ អាជ្ញាធរបានត្រួតពិនិត្យតាមរោងចក្រ កន្លែងធ្វើការ និងកន្លែងការងារនានាជិត ២ពាន់កន្លែង (១៧៧៤កន្លែង) នៅទូទាំងប្រទេស ចាប់ពីថ្ងៃទី៥ ដល់ថ្ងៃទី១២ ខែមិថុនា ឆ្នាំ២០២៤ នេះ។
កាសែត The Nation បញ្ជាក់ថា ក្នុងចំណោមពលករខុសច្បាប់ដែលត្រូវបានចាប់ខ្លួនទាំងនោះ ពលករបរទេសចំនួន ២៤០នាក់ ត្រូវបានអាជ្ញាធរថៃ កាត់ទោស ក្នុងនោះពលករ ១៩០នាក់មកពីប្រទេសភូមា ពលករ ៣៨នាក់មកពីប្រទេសឡាវ ពលករ ៨នាក់មកពីកម្ពុជា និង ៤នាក់ទៀតមកពីប្រទេសផ្សេងៗ ខណៈកម្មករដែលត្រូវបានឃុំខ្លួនដទៃទៀត ត្រូវទទួលទោសទណ្ឌផ្សេងៗ រួមទាំងការផាកពិន័យ និងការនិរទេសទៅប្រទេសកំណើតវិញផងដែរ។
ច្បាប់ការងារប្រទេសថៃ ចែងថា ពលករចំណាកស្រុកណាដែលធ្វើការដោយគ្មានការអនុញ្ញាតត្រឹមត្រូវ ឬធ្វើអាជីវកម្មណាដែលគ្មានការអនុញ្ញាត អាចនឹងត្រូវពិន័យជាប្រាក់ពី ៥ពាន់បាតទៅដល់ ៥ម៉ឺនបាត ព្រមទាំងហាមធ្វើការនៅប្រទេសថៃ រយៈពេល ២ឆ្នាំ និងនិរទេសត្រឡប់ទៅប្រទេសកំណើតវិញថែមទៀត។
លើសពីនេះ ប្រសិនបើពលករខុសច្បាប់ទាំងនោះមិនអាចបង់ប្រាក់ពិន័យទេ ពួកគេត្រូវប្រឈមនឹងការជាប់ពន្ធនាគារ ប៉ុន្តែអំឡុងពេលដែលពួកគេត្រូវបាននិរទេស ស្រាប់តែពលករទាំងនោះវិលចូលទៅប្រទេសថៃ វិញ ពួកគេនឹងត្រូវប្រឈមមុខនឹងការជាប់ពន្ធនាគាររយៈពេលពីរឆ្នាំដដែល។
ទាក់ទិននឹងបញ្ហានេះ របាយការណ៍របស់អង្គការសង់ត្រាល់ បានបង្ហាញកាលពីពេលថ្មីៗនេះថា គិតត្រឹមដើមឆ្នាំ២០២៣ ពលករខ្មែរដែលកំពុងរស់នៅ និងធ្វើការងារនៅក្នុងប្រទេសថៃ មានចំនួនជាង ២លាននាក់ ក្នុងនោះពលករខ្មែរប្រមាណ ១លាននាក់ដែលមិនមានឯកសារស្របច្បាប់ កំពុងប្រឈមការកេងប្រវ័ញ្ចកម្លាំងពលកម្ម និងបារម្ភចំពោះការចាប់ខ្លួនពីសមត្ថកិច្ចថៃ។
ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសន៍នៃអង្គការសង់ត្រាល់ លោក ឌីថេ ហូយ៉ា ធ្លាប់បានអះអាងកាលពីពេលកន្លងទៅថា ក្នុងចំណោមពលករខ្មែរជាង ១លាននាក់ដែលមិនមានឯកសារផ្លូវច្បាប់ ដោយសារតែមួយចំនួនចូលទៅទឹកដីថៃ ដោយគ្មានឯកសារត្រឹមត្រូវ និងមួយចំនួនទៀត ឯកសារផ្លូវច្បាប់របស់ពួកគេផុតកំណត់ព្រោះតែមិនបន្តសុពលភាព។
ជុំវិញបញ្ហានេះ កាលពីថ្ងៃទី៥ ខែកក្កដា ឆ្នាំ២០២៣ គណៈរដ្ឋមន្ត្រីថៃ បានយល់ព្រមក្នុងការបន្តពេលវេលាសម្រាប់ពលករបរទេសដោយអនុម័តទៅលើសំណើរបស់ក្រសួងការងារថៃ ដូចជាបន្ធូរបន្ថយដល់ពលករបរទេស ក្នុងនោះថៅកែរោងចក្រដែលបានដាក់ស្នើបញ្ជីឈ្មោះពលករត្រឹមថ្ងៃទី៣១ ខែកក្កដា ឆ្នាំ២០២៣ ស្របតាមការណែនាំរបស់គណៈរដ្ឋមន្ត្រី គឺអនុញ្ញាតឱ្យពលករបរទេសអាចស្នាក់នៅ និងធ្វើការនៅក្នុងប្រទេសថៃ រហូតដល់ថ្ងៃទី១៣ ខែកុម្ភៈ ឆ្នាំ២០២៥។
ជាងនេះទៀត ពលករដែលមកពីប្រទេសកម្ពុជា ឡាវ និងមីយ៉ាន់ម៉ា ដែលបានបញ្ចប់កិច្ចសន្យា MOU រយៈពេល ៤ឆ្នាំ ចន្លោះថ្ងៃទី១ ខែវិច្ឆិកា ឆ្នាំ២០២០ និងថ្ងៃទី៣១ ខែធ្នូ ឆ្នាំ២០២៣ អាចស្នាក់នៅ និងធ្វើការនៅក្នុងប្រទេសថៃ រហូតដល់ថ្ងៃទី៣០ ខែមេសា ឆ្នាំ២០២៤ ផងដែរ។
ប៉ុន្តែអំឡុងពេលនោះ ថៅកែរោងចក្រត្រូវតែរៀបចំដំណើរការស្នើសុំការអនុញ្ញាតជ្រើសរើសពលករតាមប្រព័ន្ធ MOU ឡើងវិញ ខណៈពលករបរទេសទាំងនោះអាចត្រឡប់ទៅកាន់ប្រទេសខ្លួនវិញដើម្បីដំណើរការលិខិតអនុញ្ញាត និងត្រឡប់មកកាន់ប្រទេសថៃ វិញ ដោយមិនចាំបាច់ត្រូវរង់ចាំរហូតរយៈពេលដល់ ៣០ថ្ងៃឡើយ។
ទាក់ទិននឹងបញ្ហានេះ កាលពីដើមខែតុលា ឆ្នាំ២០២៣ រដ្ឋមន្ត្រីក្រសួងមហាផ្ទៃលោក ស សុខា បានចេញសេចក្តីណែនាំមួយ ដោយបញ្ជាឱ្យអាជ្ញាធរខេត្តជាប់ព្រំដែនជាមួយប្រទេសជិតខាងគ្រប់ខេត្ត បិទច្រករបៀងខុសច្បាប់ទាំងអស់។
លោក ស សុខា បញ្ជាក់ថា ក្រសួងមហាផ្ទៃបានកត់សម្គាល់ឃើញពីភាពខ្វះចន្លោះ និងភាពមិនប្រក្រតីមួយចំនួនដែលកើតចេញពីការធ្វេសប្រហែសក្នុងការអនុវត្តតួនាទីភារកិច្ចរបស់អាជ្ញាធរមានសមត្ថកិច្ចនៅតាមបណ្តាខេត្តជាប់ព្រំដែន ដូច្នេះដើម្បីបង្ការ ទប់ស្កាត់ និងបង្ក្រាបរាល់បទល្មើសឆ្លងដែន និងបញ្ឈប់នូវការចេញឯកសារឆ្លងដែនមិនប្រក្រតី គឺមានតែបិទច្រករបៀងខុសច្បាប់ប៉ុណ្ណោះ៕