ក្រុមអ្នកសង្កេតការណ៍ចាត់ទុកការចោទប្រកាន់អតីតឧកញ៉ា ស្រី ស៊ីណា ពីបទឃាតកម្ម មិនគិតទុកជាមុនតាមមាត្រា១៩៩ ដែលត្រូវដាក់គុក ១៥ឆ្នាំ គឺជាការចោទប្រកាន់ប្រាសចាកនីតិវិធីច្បាប់ ដោយសារជនល្មើសបានត្រៀមខ្លួនជាស្រេចក្នុងការសម្លាប់ ដែលសមនឹងទទួលទោសដាក់គុកមួយជីវិតតាមមាត្រា២០០ នៃក្រមព្រហ្មទណ្ឌ។
អតីតមន្ត្រីជាន់ខ្ពស់សមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី២៤ មិថុនា នេះថា តាមរយៈភស្តុតាងជាខ្សែវីដេអូដែលផ្ដិតជាប់ក្នុងកាមេរ៉ាសុវត្ថិភាព បានបង្ហាញយ៉ាងច្បាស់ថា ជនដៃដល់បានត្រៀមខ្លួនរួចជាស្រេចក្នុងអំពើឃាតកម្មនេះ ព្រោះថាពេលទៅផ្ទះជនរងគ្រោះ ជនដៃដល់មានកាំភ្លើងខ្លីសៀតជាប់នឹងចង្កេះរួចជាស្រេចដែលបង្កប់ក្នុងអាវក្រៅ។
លោក ស៊ឹង សែនករុណា លើកឡើងថា ជម្លោះរវាងជនរងគ្រោះ និងអ្នកជិតខាង បានកើតឡើងតាំងពី ២ ទៅ ៣ថ្ងៃមុនម្ល៉េះ ខណៈអតីតឧកញ៉ា ស្រី ស៊ីណា ទើបនឹងលេចមុខនៅពេលក្រោយ ដូច្នេះមានន័យថា ចាប់តាំងពីចេញដំណើរពីគេហដ្ឋានរបស់គាត់ទៅកន្លែងកើតហេតុដែលប្រដាប់ដោយអាវុធមានគ្រាប់ពេញ គឺបញ្ជាក់យ៉ាងច្បាស់ថា ឃាតកររូបនេះមានចេតនាទៅសម្លាប់ និងបានត្រៀមខ្លួនរួចជាស្រេចទៅហើយ។
អតីតមន្ត្រីជាន់ខ្ពស់អង្គការក្រៅរដ្ឋាភិបាលរូបនេះបញ្ជាក់ថា ការចោទប្រកាន់របស់តុលាការលើជនដៃដល់ដែលដាក់ទោសត្រឹមតែជាប់គុក ១៥ឆ្នាំ ប្រាកដជារងនូវការរិះគន់ពីប្រជាពលរដ្ឋ ដូច្នេះករណីនេះ តុលាការគួរអនុវត្តច្បាប់ឱ្យបានយុត្តិធម៌សម្រាប់ជនរងគ្រោះ ដើម្បីព្រមានដល់មនុស្សដែលរំលោភបំពានច្បាប់ដទៃទៀត ហើយបើផ្អែកតាមភស្តុតាង ការកាត់ទោសដាក់គុកឃាតកររូបនេះមួយជីវិត គឺជាការសម្រេចត្រឹមត្រូវបំផុត។
ការអះអាងនេះ ធ្វើឡើងបន្ទាប់ពីអយ្យការអមសាលាដំបូងក្រុងភ្នំពេញ សម្រេចចោទប្រកាន់អតីតឧកញ៉ា ស្រី ស៊ីណា ដែលបានសម្លាប់មនុស្សកាលពីពេលថ្មីៗនេះពីបទ ឃាតកម្ម, ប៉ុនប៉ងឃាតកម្ម និងការប្រើអាវុធខុសច្បាប់ប៉ុណ្ណោះ មិនជាឃាតកម្មគិតទុកជាមុនតាមមាត្រា២០០ នោះទេ។
កាលពីថ្ងៃទី២៣ ខែមិថុនា ឆ្នាំ២០២៤ សាលាដំបូងរាជធានីភ្នំពេញ បានចេញសេចក្តីប្រកាសព័ត៌មានថា អំពើឃាតកម្មរបស់អតីតឧកញ៉ា ស្រី ស៊ីណា ត្រូវបានចោទប្រកាន់ក្នុងសំណុំរឿងចំនួន ២ គឺទី១ ពីបទឃាតកម្ម និងប្រើប្រាស់អាវុធដោយគ្មានការអនុញ្ញាត ដែលត្រូវដាក់គុកចំនួន ១៥ឆ្នាំ តាមមាត្រា១៩៩។ ចំណែកឯសំណុំរឿងទី២ គឺអំពីបទប៉ុនប៉ងឃាតកម្ម និងប្រើអាវុធដោយគ្មានការអនុញ្ញាត ដែលបានបង្ករបួសស្នាមដល់ជនរងគ្រោះ ២នាក់ផ្សេងទៀតក្នុងហេតុការណ៍បាញ់សម្លាប់នោះ ដែលត្រូវផ្ដន្ទាទោសចំនួនរហូតដល់ ១៥ឆ្នាំដូចគ្នាដែរ។
ប្រភពដដែលបញ្ជាក់ថា ចៅក្រមស៊ើបសួរនឹងធ្វើការស្រាវជ្រាវឱ្យបានស៊ីជម្រៅបន្ថែមទៀតលើសំណុំរឿងនេះ ក្នុងករណីរកឃើញនូវភស្តុតាងថ្មីបន្ថែមទៀត ដើម្បីចាត់វិធានការអនុវត្តច្បាប់ឱ្យបានម៉ឺងម៉ាត់ និងដើម្បីផ្តល់យុត្តិធម៌ឱ្យបានត្រឹមត្រូវតាមច្បាប់របស់កម្ពុជា។
ក្រោយការសម្រេចរបស់តុលាការ ស្រាប់តែខ្សែវីដេអូមួយត្រូវបានគេទម្លាយលើបណ្ដាញសង្គមហ្វេសប៊ុកព្រោងព្រាត ដែលបានបង្ហាញពីទង្វើអមនុស្សធម៌ឃោរឃៅរបស់អតីតឧកញ៉ា ស្រី ស៊ីណា ក្នុងការធ្វើសកម្មភាពបាញ់សម្លាប់ទៅលើជនរងគ្រោះ ដែលសកម្មភាពនៃឃាតកម្មនេះបានបង្ហាញឱ្យឃើញនូវការត្រៀមទុករបស់ជនដៃដល់ មុននឹងឈានដល់ការបាញ់សម្លាប់នេះ។
ទាក់ទិននឹងការទម្លាយវីដេអូនេះ រដ្ឋមន្ត្រីក្រសួងព័ត៌មាន លោក នេត្រ ភក្ដ្រា សរសេរលើគណនីហ្វេសប៊ុករបស់ខ្លួនកាលពីថ្ងៃទី២២ ខែមិថុនា ថា ការផ្សព្វផ្សាយវីដេអូនេះបានធ្វើឱ្យប៉ះពាល់ដល់ផ្លូវចិត្តរបស់គ្រួសារជនរងគ្រោះ និងប៉ះពាល់ដល់សេចក្តីថ្លៃថ្នូរនៃជនរងគ្រោះយ៉ាងធ្ងន់ធ្ងរ ហើយការផ្សព្វផ្សាយឃ្លីបវីដេអូនេះពីសំណាក់ប្រព័ន្ធផ្សព្វផ្សាយ ក៏ប៉ះពាល់ដល់ក្រមសីលធម៌វិជ្ជាជីវៈសារព័ត៌មានផងដែរ។ លោក នេត្រ ភក្ដ្រា អំពាវនាវឱ្យបញ្ឈប់ការចែកចាយផ្សព្វផ្សាយខ្សែវីដេអូនេះជាបន្ទាន់ និងស្នើឱ្យអ្នកប្រើប្រាស់បណ្ដាញសង្គមទាំងអស់ បញ្ឈប់ការចែករំលែកនូវរូបភាពដ៏សាហាវឃោរឃៅនេះថែមទៀត។
ទោះជាបែបនេះក្តី រដ្ឋលេខាធិការក្រសួងព័ត៌មាន លោក ជុំ កុសល បានសរសេរលើគណនីហ្វេសប៊ុករបស់ខ្លួនកាលពីថ្ងៃទី២៣ មិថុនា ថា សម្រាប់ករណីឃាតកម្មរបស់អតីតឧកញ៉ា ស្រី ស៊ីណា បើសម្រេចថាមិនមែនជាអំពើឃាតកម្មគិតទុកជាមុន ដូចជាមិនសមទំនងឡើយ ព្រោះខ្មាន់កាំភ្លើង និងជនរងគ្រោះ មិនដែលស្គាល់គ្នាទេពីមុនមក រីឯទំនាស់គឺកើតឡើងរវាងតែអ្នកផ្ទះជាប់គ្នាប៉ុណ្ណោះ។
លោកបន្តថា ប៉ុន្តែក្រោយមានទំនាស់ ស្រាប់តែលេចមុខខ្មាន់កាំភ្លើងមកដល់ក្នុងផ្ទះជនរងគ្រោះជាមួយនឹងកាំភ្លើង ពាក់អាវដៃវែងពីលើអាវយឺត ដើម្បីងាយស្រួលសៀតកាំភ្លើងនៅចង្កេះ និងដើរចូលក្នុងផ្ទះជនរងគ្រោះ ព្រមទាំងប្រើសម្ដីធ្ងន់ៗដាក់ជនរងគ្រោះ ហើយក៏ធ្វើការបាញ់សម្លាប់លើជនរងគ្រោះតែម្តង។
លោក ជុំ កុសល បន្ថែមថា ពេលបាញ់សម្លាប់បុរសដែលជាគូដណ្ដឹងរួចហើយ ក៏បាញ់សម្លាប់នារីដែលជាគូដណ្ដឹងថែមទៀត នៅពេលនាងចូលទៅជួយ។ លើសពីនេះ ក៏បាញ់សម្លាប់បុគ្គលិក ២នាក់ដែលកំពុងអង្គុយធ្វើការក្នុងផ្ទះនោះដែរ ចំណែកឯរថយន្តរបស់ខ្មាន់កាំភ្លើងដែលជាមធ្យោបាយធ្វើដំណើរ បានទុកនៅឆ្ងាយពីកន្លែងកើតហេតុ។
ប្រភពដដែលលើកឡើងថា សកម្មភាពនេះមានន័យថា ខ្មាន់កាំភ្លើងបានទទួលដំណឹងពីអ្នកជួលផ្ទះរួច ហើយរៀបចំខ្លួនជាស្រេចក្នុងការធ្វើសកម្មភាពនេះតែម្តង ព្រោះរូបគេមានទាំងកាំភ្លើង ទាំងការទុករថយន្តពីចម្ងាយ ដើម្បីងាយស្រួលចល័តខ្លួនក្រោយធ្វើសកម្មភាព ដូច្នេះ តើបែបនេះអាចចាត់ទុកថាឃាតកម្មមិនគិតទុកជាមុនបានទេ?
លោក ជុំ កុសល បញ្ជាក់ថា ពាក្យថាមិនគិតទុកជាមុន គឺមានន័យថា មិនបានត្រៀមមុន ដូចជា ឧបករណ៍ អាវុធមកជាមួយ នៅពេលមានការប្រទូសរ៉ាយក៏សម្លាប់តែម្តង រីឯការបំបែកសំណុំរឿងជាពីរ ក៏មិនសមទំនងថែមទៀត ព្រោះអង្គហេតុកើតក្នុងពេលតែមួយ។
មន្ត្រីរដ្ឋាភិបាលកម្ពុជារូបនេះគូសបញ្ជាក់ថា លោកគ្រាន់តែឆ្ងល់ប៉ុណ្ណោះ ពីព្រោះមាត្រា១៩៩ នៃក្រមព្រហ្មទណ្ឌ បានចែងពីបទចោទឃាតកម្មសម្លាប់ មិនគិតទុកជាមុន ត្រូវទទួលទោសជាប់ពន្ធនាគារពី ១០ ទៅ ១៥ឆ្នាំ ប៉ុន្តែមាត្រា២០០ បទចោទឃាតកម្មសម្លាប់គិតទុកមុន គឺត្រូវជាប់ពន្ធនាគារអស់មួយជីវិត ដូច្នេះចំពោះករណីឃាតកម្មនេះ តើសមចោទថា ឃាតកម្មសម្លាប់មិនគិតទុកមុនដែរឬទេ។
ជុំវិញការកាត់ក្តីរបស់តុលាការលើសំណុំរឿងលោក ស្រី ស៊ីណា តំណាងរាស្ត្រគណបក្សសង្គ្រោះជាតិ លោក អ៊ុំ សំអាន បានសរសេរលើគណនីហ្វេសប៊ុករបស់ខ្លួនកាលពីថ្ងៃទី២៣ មិថុនា នេះថា ជាការសម្រេចមិនសមទំនងដែលតំណាងអយ្យការចោទប្រកាន់អតីតឧកញ៉ា ស្រី ស៊ីណា ដែលអាចជាប់គុកយ៉ាងច្រើន ១៥ឆ្នាំក្នុងអំពើឃាតកម្មនេះ។
លោក អ៊ុំ សំអាន លើកឡើងថា ការបាញ់មនុស្សស្លាប់ ២នាក់ គួរតែដាក់គុកអស់មួយជីវិត មិនមែនជាប់គុកយ៉ាងច្រើន ១៥ឆ្នាំនោះទេ ហើយការជាប់គុកក្នុងរយៈពេល ១៥ឆ្នាំបែបនេះ គឺមានន័យថា ជនល្មើសអាចជាប់គុកតិចជាង ១៥ឆ្នាំ។
លោកពន្យល់ថា អតីតឧកញ៉ា ស្រី ស៊ីណា អាចជាប់គុកត្រឹមតែ ២សប្តាហ៍ រួចហើយក៏ផ្លាស់ទៅរស់នៅបន្ទប់ម៉ាស៊ីនត្រជាក់ (VIP) នៅមន្ទីរពេទ្យរុស្ស៊ី ប៉ុន្តែ ២ ឬ ៣ឆ្នាំក្រោយមក តុលាការក៏ដោះលែងឱ្យនៅក្រៅឃុំដូចករណីឧកញ៉ា ថោង សារ៉ាត់ ដែលបានសម្លាប់មនុស្សដូច្នោះដែរ។
លោក អ៊ុំ សំអាន លើកឡើងថា ករណីឧកញ៉ា ថោង សារ៉ាត់ ត្រូវតុលាការកាត់ទោសឱ្យជាប់គុកអស់មួយជីវិត ប៉ុន្តែគាត់បានដេកនៅបន្ទប់ម៉ាស៊ីនត្រជាក់ (VIP) នៅមន្ទីរពេទ្យរុស្ស៊ី ប្រហែលជាង ៣ឆ្នាំ ក៏ត្រូវតុលាការដោះលែងឱ្យនៅក្រៅឃុំ។
ក្រៅពីនេះទៀត ករណីឧកញ៉ា គិត ធាង បងប្រុសបង្កើតឧកញ៉ា គិត ម៉េង ក៏ត្រូវតុលាការកាត់ទោសឱ្យជាប់គុក ៤ឆ្នាំពាក់ព័ន្ធគ្រឿងញៀន ៥០គីឡូក្រាមដែរ ប៉ុន្តែគាត់ដេកនៅបន្ទប់ម៉ាស៊ីនត្រជាក់ (VIP) នៅមន្ទីរពេទ្យរុស្ស៊ី ប្រហែល ២ឆ្នាំ ក៏ត្រូវតុលាការដោះលែងឱ្យនៅក្រៅឃុំ ដូច្នេះករណីអតីតឧកញ៉ា ស្រី ស៊ីណា ក៏ទំនងជាដូចករណីឧកញ៉ា ថោង សារ៉ាត់ និងករណីឧកញ៉ា គិត ធាង ដែរ។
ជុំវិញបញ្ហានេះ ក្រសួងយុត្តិធម៌ បានចេញសេចក្តីប្រកាសព័ត៌មាន នៅថ្ងៃទី២៤ មិថុនា នេះថា រដ្ឋមន្ត្រីក្រសួងយុត្តិធម៌ លោក កើត រិទ្ធ នឹងធ្វើសន្និសីទសារព័ត៌មាននៅថ្ងៃទី២៦ ខែមិថុនា ខាងមុខនេះលើករណីឃាតកម្មដែលប្រព្រឹត្តដោយជនល្មើសឈ្មោះ ស្រី ស៊ីណា កាលពីពេលកន្លងទៅនោះ។
ទាក់ទិននឹងបញ្ហានេះ មន្ត្រីជាន់ខ្ពស់គណបក្សកម្លាំងជាតិ លោក រ៉ុង ឈុន បានលើកឡើងកាលពីពេលកន្លងទៅថា អំឡុងពេលដែលលោកត្រូវបានតុលាការឃុំខ្លួនអស់រយៈពេលជាង ១ឆ្នាំ លោកបានសង្កេតឃើញថា ប្រព័ន្ធច្បាប់នៅប្រទេសកម្ពុជា គ្រាន់តែជាទីផ្សារទិញលក់រឿងក្ដីសម្រាប់អ្នកមានលុយ និងមានអំណាចប៉ុណ្ណោះ មិនមែនជាកន្លែងផ្តល់យុត្តិធម៌ឱ្យពលរដ្ឋក្រីក្រ និងស្លូតត្រង់នោះទេ៕