មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ដែលហៅកាត់ថា សង់ត្រាល់ ប្រកាសស្វាគមន៍រាល់កិច្ចសន្ទនាគ្រប់ទម្រង់ ដើម្បីធានាឱ្យមានភាពច្បាស់លាស់ និងដើម្បីបង្ការកុំឱ្យមានការភ័ន្តច្រឡំជុំវិញរបាយការណ៍របស់ខ្លួនដែលបានចេញផ្សាយពីស្ថានភាពសេរីភាពរបស់សហជីពក្នុងប្រទេសកម្ពុជា កន្លងមក។
អ្នកគ្រប់គ្រងផ្នែកសិទ្ធិការងាររបស់អង្គការសង់ត្រាល់ លោក ឃុន ថារ៉ូ ប្រាប់សារព័ត៌មាន The Cambodia Daily នៅថ្ងៃទី២៦ មិថុនា នេះថា អង្គការសង់ត្រាល់គោរពសិទ្ធិសេរីភាពបញ្ចេញមតិរបស់សហជីពទាំងអស់ ព្រមទាំងទទួលយកនូវមតិរិះគន់នានាផងដែរ ព្រោះថានេះគឺជាសិទ្ធិសេរីភាពជាមូលដ្ឋានរបស់សហជីពដែលត្រូវធ្វើដើម្បីសម្ដែងមតិរបស់ពួកគេ។
លោក ឃុន ថារ៉ូ អះអាងថា ជុំវិញការរិះគន់នាពេលនេះ គឺក្នុងនាមជាស្ថាប័នដែលបានសម្របសម្រួលក្នុងការសរសេររបាយការណ៍ស្ដីពីស្ថានភាពសេរីភាពរបស់សហជីពក្នុងប្រទេសកម្ពុជា។
លោកបន្តថា សង់ត្រាល់នឹងពិគ្រោះយោបល់ជាមួយសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU) និងសហព័ន្ធសហជីពកម្ពុជា (CATU) ដែលបានចូលរួមសម្របសម្រួលក្នុងការប្រមូលទិន្នន័យទាំងនោះ។
មន្ត្រីសង្គមស៊ីវិលរូបនេះបញ្ជាក់ថា ការពិគ្រោះយោបល់រវាងសង់ត្រាល់, CATU រួមទាំង C.CAWDU គឺមានបំណងឆ្លើយតបចំពោះសំណួរ ឬកង្វល់នានាពីសហជីពដៃគូកម្មវិធីរោងចក្រកាន់តែប្រសើរនៅកម្ពុជា ព្រមទាំងអ្នកពាក់ព័ន្ធដទៃទៀតផងដែរ។
កាលពីថ្ងៃទី២៥ ខែមិថុនា ឆ្នាំ២០២៤ សហព័ន្ធសហជីពកម្ពុជាដែលហៅកាត់ថា CATU បានចេញសេចក្តីថ្លែងការណ៍មួយ ដោយអះអាងថា ខ្លួននៅតែបន្តគាំទ្ររបាយការណ៍របស់សង់ត្រាល់ស្ដីពីស្ថានភាពសេរីភាពរបស់សហជីពក្នុងប្រទេសកម្ពុជា ព្រោះថាករណីការចុះបញ្ជីសហជីព និងការប្រើប្រាស់ប្រព័ន្ធតុលាការគំរាមកំហែងលើសេរីភាពសហជីព នៅតែជាឧបសគ្គនៅឡើយសម្រាប់កម្ពុជា។
ប្រភពដដែលលើកឡើងថា ការបញ្ឈប់ថ្នាក់ដឹកនាំសហជីព រួមទាំងការសហការរបស់អាជ្ញាធរមូលដ្ឋាន និងថៅកែរោងចក្រ ដែលដាក់សម្ពាធលើស្ថាបនិករបស់សហជីព នៅតែជាបញ្ហានៅឡើយ ខណៈរោងចក្រទាំងនោះក៏សុទ្ធសឹងតែជាសមាជិករបស់រោងចក្រកាន់តែប្រសើរនៅកម្ពុជាដែរ (Better Factories Cambodia) BFC។
ការអះអាងនេះ ធ្វើឡើងបន្ទាប់ពីក្រុមសហព័ន្ធសហជីពដែលមាននិន្នាការខាងរដ្ឋាភិបាល ចេញធ្វើកូដកម្មប្រឆាំងទៅនឹងរបាយការណ៍ស្ដីពីស្ថានភាពសេរីភាពរបស់សហជីពក្នុងប្រទេសកម្ពុជា ដែលចងក្រងដោយសង់ត្រាល់ និងសហជីពមួយចំនួនទៀត។
កាលពីថ្ងៃទី២៤ ខែមិថុនា ឆ្នាំ២០២៤ ក្រុមសហព័ន្ធសហជីពដែលគេដឹងថាមាននិន្នាការខាងរដ្ឋាភិបាល បានចេញធ្វើកូដកម្មប្រឆាំងទៅនឹងរបាយការណ៍របស់អង្គការសង់ត្រាល់ ដោយអះអាងថាជារបាយការណ៍បំភ្លៃការពិត ជ្រៀតជ្រែក ញុះញង់ បំភិតបំភ័យ បំបែកបំបាក់ និងលាបពណ៌សហជីពនៅកម្ពុជា។
យ៉ាងណាក៏ដោយ សម្ព័ន្ធសហជីព និងអង្គការក្រៅរដ្ឋាភិបាលដ៏ធំបំផុតមួយដែលមានឈ្មោះថា Clean Clothes Campaign បានចេញសេចក្តីថ្លែងការណ៍ថ្កោលទោសយុទ្ធនាការរបស់ក្រុមសហព័ន្ធសហជីពដែលមាននិន្នាការខាងរដ្ឋាភិបាលទាំងនោះថា ជាយុទ្ធនាការបង្ខូចកេរ្តិ៍ឈ្មោះរបស់អង្គការការពារសិទ្ធិការងារឯករាជ្យនៅកម្ពុជាប៉ុណ្ណោះ។
ជុំវិញបញ្ហានេះ អ្នកនាំពាក្យរងក្រសួងមហាផ្ទៃ លោក ទូច សុឃៈ បានអះអាងកាលពីថ្ងៃទី២៥ មិថុនា នេះថា ក្រសួងមហាផ្ទៃ កំពុងពិនិត្យមើលផ្នែកច្បាប់ លក្ខន្តិកៈរបស់អង្គការសមាគម និងសំណូមពរទាំងឡាយដែលតំណាងកម្មករនិយោជិតបានដាក់ញត្តិស្នើសុំការអន្តរាគមន៍ឱ្យពិនិត្យការអនុវត្តសកម្មភាព និងការប្រើប្រាស់កញ្ចប់ថវិការបស់អង្គការសង់ត្រាល់។
ក្រុមអ្នកឃ្លាំមើលលើកឡើងថា ការចេញធ្វើកូដកម្មរបស់ក្រុមសហជីពទាំងនោះ គឺជាយុទ្ធនាការថ្មីមួយរបស់រដ្ឋាភិបាល ក្នុងការកម្ចាត់សង្គមស៊ីវិលឯករាជ្យនៅកម្ពុជា បន្ទាប់ពីជោគជ័យក្នុងការកម្ចាត់សារព័ត៌មានឯករាជ្យខ្ទេចគ្មានសល់កាលពីដើមឆ្នាំ២០២៣ កន្លងទៅ។
កាលពីថ្ងៃទី៤ ខែមិថុនា ឆ្នាំ២០២៤ អង្គការសង់ត្រាល់ បានចេញផ្សាយរបាយការណ៍មួយស្ដីពីស្ថានភាពកម្មករ និងសហជីពក្នុងវិស័យកាត់ដេរ ដោយធ្វើការវាយតម្លៃលើសហជីពក្នុងរោងចក្រចំនួន ១៤ នៅកម្ពុជា។
ក្នុងរបាយការណ៍នេះ បង្ហាញថា មានសហជីពចំនួន ១០ បានរងនូវការបំភិតបំភ័យដោយផ្ទាល់មាត់ ការគំរាមកំហែង ការបៀតបៀន និងការដាក់ក្នុងបញ្ជីខ្មៅដែលធ្វើឱ្យប៉ះពាល់ដល់ការបំពេញការងាររបស់ពួកគេយ៉ាងធ្ងន់ធ្ងរ៕