កំពូលទីប្រឹក្សារបស់លោក ដូណាល់ ត្រាំ ចំនួន ២រូប បានបង្ហាញផែនការមួយឆ្ពោះទៅរកការបញ្ចប់សង្គ្រាមនៅអ៊ុយក្រែន ដែលជាសង្គ្រាមឈ្លានពានពីប្រទេសរុស្ស៊ី ប្រសិនបើលោក ត្រាំ ឈ្នះនៅក្នុងការបោះឆ្នោតប្រធានាធិបតីនៅក្នុងការបោះឆ្នោតនៅខែវិច្ឆិកា ឆ្នាំ២០២៤ ខាងមុខនេះ។
ទីភ្នាក់ងារសារព័ត៌មាន Reuters បានចុះផ្សាយកាលពីថ្ងៃទី២៥ មិថុនា ថា ផែនការសន្តិភាពដែលរៀបរៀងដោយទីប្រឹក្សារបស់លោក ដូណាល់ ត្រាំ គឺការបញ្ឈប់ការផ្ដល់ជំនួយយោធាទៅឱ្យអ៊ុយក្រែន បើអ៊ុយក្រែន មិនព្រមទៅកាន់តុចរចា។
ជាមួយគ្នានេះ សហរដ្ឋអាមេរិកនឹងព្រមានទៅក្រុងមូស្គូ ផងដែរ បើសិនក្រុងមូស្គូ ច្រានចោលការចរចា គឺក្រុងវ៉ាស៊ីនតោន នឹងបង្កើនជំនួយយោធាថែមទៀតទៅឱ្យអ៊ុយក្រែន។ នេះបើយោងតាមលោក Keith Kellogg ឧត្តមសេនីយ៍ចូលនិវត្តន៍ដែលជាទីប្រឹក្សាសន្តិសុខជាតិរបស់លោក ដូណាល់ ត្រាំ។
តាមប្រភពព័ត៌មានរបស់ទីភ្នាក់ងារសារព័ត៌មាន Reuters ផែនការសន្តិភាពរបស់លោក ត្រាំ សម្រាប់ប្រទេសអ៊ុយក្រែន គឺជាយុទ្ធសាស្ត្ររបស់លោក ត្រាំ ដែលជាបេក្ខជនប្រធានាធិបតីមកពីគណបក្សសាធារណរដ្ឋ។
អ្នកធ្វើផែនការនេះ គឺលោកឧត្តមសេនីយ៍ Kellogg និង Fred Fleitz ដែលពួកគាត់ធ្លាប់កាន់តំណែងជាប្រធានទីប្រឹក្សាសន្តិសុខជាតិរបស់លោក ត្រាំ កាលពីឆ្នាំ២០១៧ ដល់ឆ្នាំ២០២១។ តាមផែនការនេះ គឺបទឈប់បាញ់គ្នាត្រូវអនុវត្តផ្ទាល់នៅសមរភូមិជួរមុខអំឡុងការបើកកិច្ចចរចា។
បើតាមលោក Fred Fleitz ផែនការសន្តិភាពសម្រាប់ប្រទេសអ៊ុយក្រែន នេះ ទទួលបានការគាំទ្រពីគណបក្សសាធារណរដ្ឋ ហើយលោក ត្រាំ ក៏បានឯកភាពផងដែរ។ តែអ្នកនាំពាក្យសម្រាប់លោក ត្រាំ លោក Steven Cheung បាននិយាយថា មានតែសេចក្ដីថ្លែងការណ៍ដែលធ្វើឡើងដោយលោក ត្រាំ ហើយមានការយល់ព្រមពីក្រុមយុទ្ធនាការឃោសនារបស់លោក ត្រាំ ទើបចាត់ទុកជាផ្លូវការ។
បើតាមអ្នកនាំពាក្យរបស់លោក ត្រាំ ផែនការសន្តិភាពសម្រាប់ប្រទេសអ៊ុយក្រែន ដែលរៀបរៀងដោយលោក Kellogg និង Fleitz ត្រូវរង់ចាំពិនិត្យ និងសម្រេចដោយក្រុមយុទ្ធនាការឃោសនាបោះឆ្នោតរបស់លោក ត្រាំ ជាមុនសិន ប៉ុន្តែអ្នកនាំពាក្យរូបនេះបញ្ជាក់ថា បើលោក ត្រាំ ឈ្នះឆ្នោតនៅក្នុងការបោះឆ្នោតនាថ្ងៃទី៥ វិច្ឆិកា គឺលោក ត្រាំ ច្បាស់ជាប្រញាប់ប្រញាល់រកដំណោះស្រាយដើម្បីបញ្ចប់សង្គ្រាមនៅអ៊ុយក្រែន។
ចំពោះរដ្ឋការលោក ចូ បៃដិន វិញ មិនដែលបង្ខំឱ្យអ៊ុយក្រែន ទៅកាន់តុចរចានោះទេ ដោយចាត់ទុកថាវាអាស្រ័យលើរដ្ឋាភិបាលអ៊ុយក្រែន ជាអ្នកសម្រេចអំពីជោគវាសនារបស់ខ្លួន។ នេះបើយោងតាមអ្នកនាំពាក្យក្រុមប្រឹក្សាសន្តិសុខជាតិសេតវិមាន លោក Adrienne Watson។
តែអ្នកសង្កេតការណ៍ថាផែនការសន្តិភាពសម្រាប់ប្រទេសអ៊ុយក្រែន របស់ទីប្រឹក្សាលោក ត្រាំ គឺជាការដោះដូរជំហររបស់សហរដ្ឋអាមេរិកដ៏ធំមួយអំពីការជួយគាំទ្រប្រទេសអ៊ុយក្រែន ដែលតស៊ូប្រយុទ្ធដើម្បីសេរីភាព ហើយផែនការនេះអាចនឹងប្រឈមមុខនឹងការរិះគន់ពីសម្ពន្ធភាពនៅអឺរ៉ុប អាចរួមទាំងក្នុងសមាជិកសភារបស់បក្សសាធារណរដ្ឋផងដែរ។
យ៉ាងណាក៏ដោយ វិមានក្រឹមឡាំង បានឱ្យដឹងថា រាល់ផែនការសន្តិភាពដែលបំផុសគំនិតឡើងដោយលោក ដូណាល់ ត្រាំ អតីតប្រធានាធិបតីសហរដ្ឋអាមេរិក ត្រូវតែឆ្លុះបញ្ចាំងពីស្ថានភាពជាក់ស្តែង ប៉ុន្តែប្រធានាធិបតីរុស្ស៊ី លោក វ្ល៉ាឌីមៀ ពូទីន នៅតែបើកចំហសម្រាប់ការចរចា។
អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖ តម្លៃនៃផែនការណាមួយ គឺស្ថិតនៅលើស្ថានភាពជាក់ស្តែង ឱ្យស្របនឹងលោកប្រធានាធិបតី ពូទីន ដែលបានលើកឡើងម្តងហើយម្តងទៀតអំពីការបើកចំហកិច្ចចរចា ដោយគិតគូរពីភាពជាក់ស្តែងនៅសមរភូមិជួរមុខ។
នៅមុនវេទិកាពិភពលោកស្ដីពីសន្តិភាពសម្រាប់ប្រទេសអ៊ុយក្រែន ធ្វើឡើងនៅប្រទេសស្វីស កាលពីថ្ងៃទី១៥ ខែមិថុនា លោក ពូទីន បានដាក់លក្ខខណ្ឌមួយចំនួនទៅកាន់វេទិកានេះ គឺទី១ អ៊ុយក្រែន ត្រូវតែដកទ័ពរបស់ខ្លួនចេញពីសមរភូមិជួរមុខ និងទី២ ត្រូវដកពាក្យសុំចូលសមាជិកនៃអង្គការយោធាណាតូ។
លោក ពូទីន សន្យាថា បើអ៊ុយក្រែន ព្រមទទួលលក្ខខណ្ឌទាំងពីរនេះ គឺរុស្ស៊ី នឹងផ្ដើមការចរចាជាមួយអ៊ុយក្រែន និងភាគីពាក់ព័ន្ធទាំងអស់។
ប៉ុន្តែភាគីអ៊ុយក្រែន បានទាត់ចោលទាំងស្រុង។ លោកប្រធានាធិបតី វូឡូឌីមៀ ហ្សេឡេនស្គី បានថ្លែងថា មិនអាចទទួលបានឡើយ ព្រោះលក្ខខណ្ឌរបស់អ្នកឈ្លានពានមិនឆ្លើយតបនឹងស្ថានភាពជាក់ស្ដែង។
ភ្លាមៗក្រោយពីវេទិកាសន្តិភាពនៅប្រទេសស្វីស ចេញសេចក្ដីថ្លែងការណ៍ដោយមាន ៨០ប្រទេស និង ៤អង្គការអន្តរជាតិគាំទ្រ លោក ហ្សេឡេនស្គី បានថ្លែងទៅលោក ពូទីន វិញ ការចរចាអាចចាប់ផ្ដើមបានហើយដោយយកផែនទីចង្អុលផ្លូវរបស់វេទិកាសន្តិភាពមកកំណត់គោលដៅនៃការចរចាដែលលើកឡើងពីការទាមទារឱ្យរុស្ស៊ី គោរពអធិបតេយ្យភាពបូរណភាពទឹកដីនៃប្រទេសអ៊ុយក្រែន។
តាមលោក ហ្សេឡេនស្គី ពាក្យថាគោរពអធិបតេយ្យភាពបូរណភាពទឹកដីមានន័យថា រុស្ស៊ីត្រូវដកទ័ពចេញពីប្រទេសអ៊ុយក្រែន ហើយទទួលស្គាល់កិច្ចព្រមព្រៀងព្រំដែនរួមនៅឆ្នាំ១៩៩១ ដែលដែនដីអ៊ុយក្រែន នៅជ្រោយឧបទ្វីបគ្រីមៀ ក៏ស្ថិតក្នុងអធិបតេយ្យភាពអ៊ុយក្រែន ដែរ ទោះជារុស្ស៊ី យកបានតាំងពីឆ្នាំ២០១៤ ក៏ដោយ។
ថ្មីៗនេះបើយោងតាមការស្ទង់មតិរបស់ Reuters/Ipsos បង្ហាញថា អ្នកបោះឆ្នោតអាមេរិកចាត់ទុកលោក ដូណាល់ ត្រាំ ជាបេក្ខជនប្រធានាធិបតីល្អជាងលោក បៃដិន តែខាងផ្នែកសេដ្ឋកិច្ចប៉ុណ្ណោះ ប៉ុន្តែពួកគេចូលចិត្តវិធីសាស្ត្ររបស់បេក្ខជនគណបក្សប្រជាធិបតេយ្យ និងជាប្រធានាធិបតីបច្ចុប្បន្នលោក ចូ បៃដិន ក្នុងការការពារលទ្ធិប្រជាធិបតេយ្យ និងជួយការពារសេរីភាពសម្រាប់ប្រទេសដែលងាយរងគ្រោះដោយប្រទេសធំឈ្លានពាន។
តាមលទ្ធផលនៃការស្ទង់មតិចុងក្រោយនេះ ទាំងលោក ដូណាល់ ត្រាំ និងលោក ចូ បៃដិន មិនទាន់មានសំឡេងលើសគ្នាដាច់ខាតនោះទេ គឺមានន័យថា នៅតែប្រហាក់ប្រហែលគ្នា។ យ៉ាងណា មានការបារម្ភមួយ គឺលោក បៃដិន មានវ័យចាស់ណាស់ទៅហើយ ដែលឆ្នាំនេះលោកមានអាយុ ៨២ឆ្នាំ ហើយលោក ត្រាំ ក៏មានវ័យចាស់បន្តិចដែរ គឺឆ្នាំនេះលោក ត្រាំ មានអាយុ ៧៧ឆ្នាំ៕