មន្ត្រីជាន់ខ្ពស់នៃក្រសួងយុត្តិធម៌ ព្រមានថា លោកនឹងលាលែងពីតំណែង ប្រសិនបើឧក្រិដ្ឋជនឈ្មោះ ស្រី ស៊ីណា មានសេរីភាព បន្ទាប់ពីជាប់ពន្ធនាគារ ២ឆ្នាំ ឬ ៣ឆ្នាំ និងធានាថាបុគ្គលនេះមិនត្រូវបានដាក់ក្នុងបញ្ជីបន្ធូរបន្ថយទោសឡើយ ដើម្បីផ្តល់យុត្តិធម៌ដល់គ្រួសារជនរងគ្រោះ។
រដ្ឋមន្ត្រីក្រសួងយុត្តិធម៌ លោក កើត រិទ្ធ បានលើកឡើងក្នុងសន្និសីទសារព័ត៌មានស្ដីពីករណីឃាតកម្មដែលប្រព្រឹត្តដោយជនល្មើសឈ្មោះ ស្រី ស៊ីណា នៅរសៀលថ្ងៃពុធ ទី២៦ មិថុនា នេះថា លោកនឹងលាលែងចេញពីតំណែងជារដ្ឋមន្ត្រីក្រសួងយុត្តិធម៌ ប្រសិនបើឧក្រិដ្ឋជនមានសេរីភាពបន្ទាប់ពីជាប់ពន្ធនាគារ ២ឆ្នាំ ឬ ៣ឆ្នាំ។ លោកថា តើលោកនៅក្នុងតំណែងនេះដើម្បីអ្វី ព្រោះភស្តុតាងមានគ្រប់គ្រាន់រួចទៅហើយនោះ។
លោកអះអាងថា លោកបានស្នើទៅតុលាការដាក់សំណុំរឿងនៃករណីឃាតកម្មមួយនេះទៅជាពីរសំណុំរឿង ដើម្បីអនុវត្តគោលការណ៍ស្រូបទោសក្នុងការអនុវត្តទោសរយៈពេល ៣០ឆ្នាំពេញតែម្តង។
លោក កើត រិទ្ធ និយាយថា ការបំបែកសំណុំរឿងទៅជាពីរ ឃាតករនឹងត្រូវដាក់ឲ្យអនុវត្តទោសក្នុងពន្ធនាគាររយៈពេល ១៥ឆ្នាំក្នុងសំណុំរឿងទី១ ហើយត្រូវអនុវត្តទោសបន្ត ១៥ឆ្នាំទៀតក្នុងសំណុំរឿងទី២ ក្រោយពីអនុវត្តទោសក្នុងសំណុំរឿងទី១ ត្រូវបានបញ្ចប់។ លោកបន្តថា ប្រសិនបើដាក់សំណុំរឿងនេះតែមួយ នឹងមិនអាចអនុវត្តគោលការណ៍ស្រូបទោសរហូតដល់ ៣០ឆ្នាំបានទេ។
លោក កើត រិទ្ធ បញ្ជាក់ថា ការសៀតកាំភ្លើង ឬអាវុធតាមខ្លួន និងបានប្រព្រឹត្តអំពើសម្លាប់អ្នកដទៃ មិនមែនសុទ្ធតែត្រូវចោទប្រកាន់ពីបទឃាតកម្មគិតទុកជាមុនបានទេ បើមិនមានភស្តុតាងគ្រប់គ្រាន់ដែលអាចបញ្ជាក់បានថា ជនដៃដល់មានផែនការក្នុងការសម្លាប់អ្នកដទៃនោះ។ លោកបន្តថា ព្រោះរាល់ការសម្រេចទាំងអស់របស់តុលាការ មិនអាចធ្វើតាមអារម្មណ៍បានទេ ដើម្បីធានានូវការអនុវត្តច្បាប់ឱ្យបានត្រឹមត្រូវ និងគ្មានភាពលម្អៀង។
កាលពីថ្ងៃទី១៧ ខែមិថុនា ឆ្នាំ២០២៤ ជនដៃដល់ឈ្មោះ ស្រី ស៊ីណា បានបាញ់សម្លាប់គូដណ្ដឹងមួយគូដល់ក្នុងផ្ទះ និងបង្ករបួសស្នាមដល់ជនរងគ្រោះ ២នាក់ផ្សេងទៀតផងដែរ។
ជុំវិញអំពើឃាតកម្មនេះ តុលាការបានសម្រេចចោទប្រកាន់ ៣ករណី គឺបទឃាតកម្ម, បទប៉ុនប៉ងឃាតកម្ម និងបទប្រើប្រាស់អាវុធខុសច្បាប់ផងដែរ ហើយករណីនេះត្រូវបានបំបែកទៅជា ២សំណុំរឿង ដែលកំណត់ឱ្យឃាតករជាប់ពន្ធនាគាររយៈពេល ៣០ឆ្នាំពេញដោយគ្មានការបន្ធូរបន្ថយទោសអ្វីទាំងអស់។
មាត្រា១៩៩ នៃក្រមព្រហ្មទណ្ឌ ចែងថា អំពើសម្លាប់មនុស្សដោយចេតនា ដោយប្រើអាវុធ ឬមិនប្រើអាវុធ ត្រូវផ្ដន្ទាទោសដាក់ពន្ធនាគារពី ១០ឆ្នាំទៅ១៥ឆ្នាំ។ ចំណែកមាត្រា២០០ នៃក្រមព្រហ្មទណ្ឌ ចែងថា ឃាតកម្មគិតទុកជាមុន គឺជាអំពើសម្លាប់មនុស្សដោយគិតទុកជាមុន ត្រូវផ្ដន្ទាទោសដាក់ពន្ធនាគារអស់មួយជីវិត។
ជុំវិញសំណុំរឿងឃាតកម្មនេះ នាយករដ្ឋមន្ត្រីកម្ពុជាលោក ហ៊ុន ម៉ាណែត បានលើកឡើងកាលពីថ្ងៃទី២៥ ខែមិថុនា នេះថា អ្នកអនុវត្តច្បាប់មិនអាចផ្ដន្ទាទោសលើជនល្មើសលើសពីអ្វីដែលច្បាប់មានចែងជាធរមាន ឬបញ្ញត្តិនោះទេ ប៉ុន្តែទៅថ្ងៃមុខ កម្ពុជាអាចនឹងធ្វើវិសោធនកម្មច្បាប់ដើម្បីបង្កើនទម្ងន់ទោសទណ្ឌសម្រាប់អ្នកប្រព្រឹត្តអំពើឃាតកម្មបែបនេះ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន លើកឡើងកាលពីពេលថ្មីៗនេះថា អតីតឧកញ៉ា ស្រី ស៊ីណា អាចនឹងជាប់គុកត្រឹមតែ ២សប្តាហ៍ រួចហើយក៏ផ្លាស់ទៅរស់នៅបន្ទប់ម៉ាស៊ីនត្រជាក់ (VIP) នៅមន្ទីរពេទ្យរុស្ស៊ី ប៉ុន្តែ ២ ឬ ៣ឆ្នាំក្រោយមក តុលាការក៏ដោះលែងឱ្យនៅក្រៅឃុំដូចករណីឧកញ៉ា ថោង សារ៉ាត់ ដែលបានសម្លាប់មនុស្សដូច្នោះដែរ។
លោក អ៊ុំ សំអាន លើកឡើងថា ករណីឧកញ៉ា ថោង សារ៉ាត់ ត្រូវបានតុលាការកាត់ទោសឱ្យជាប់គុកអស់មួយជីវិត ប៉ុន្តែគាត់បានដេកនៅបន្ទប់ម៉ាស៊ីនត្រជាក់ (VIP) នៅមន្ទីរពេទ្យរុស្ស៊ី ប្រហែលជាង ៣ឆ្នាំ ក៏ត្រូវតុលាការដោះលែងឱ្យនៅក្រៅឃុំ។
របាយការណ៍ស្ដីពីនីតិរដ្ឋឆ្នាំ២០២៣ នៃគម្រោងយុត្តិធម៌ពិភពលោក (The World Justice Project) បានដាក់ចំណាត់ថ្នាក់លេខ១៤១ ក្នុងចំណោមប្រទេស១៤២ ដល់កម្ពុជា ដោយសារតែគេរកឃើញពីការមិនធានាបាននូវប្រព័ន្ធយុត្តិធម៌របស់ខ្លួនតាមផ្លូវតុលាការ ជាដើម៕