កូនស្រីច្បងប្រធានគណបក្សសង្គ្រោះជាតិលោក កឹម សុខា ដែលកំពុងជាប់ឃុំក្នុងផ្ទះ សុំឱ្យឪពុករបស់ខ្លួនតស៊ូក្នុងកាលៈទេសៈដ៏លំបាកនេះបន្តទៀតនៅក្នុងថ្ងៃខួបកំណើតអាយុ ៧២ឆ្នាំ ព្រោះជាតិខ្មែរនៅតែត្រូវការលោក។
កញ្ញា កឹម មនោវិទ្យា បានសរសេរលើទំព័រហ្វេសប៊ុករបស់ខ្លួននៅថ្ងៃទី២៧ មិថុនា នេះថា កូនសូមជូនពរលោកឪពុកក្នុងឱកាសថ្ងៃកំណើតរបស់លោកពុក ឱ្យមានសុខភាពល្អ និងមានស្មារតីរឹងមាំ ទោះជាលោកកំពុងស្ថិតក្នុងកាលៈទេសៈដ៏លំបាកបំផុតនេះក៏ដោយ។
កញ្ញា កឹម មនោវិទ្យា បញ្ជាក់ថា ជាតិខ្មែរទាំងនគរនៅតែត្រូវការលោក កឹម សុខា ឱ្យបន្តក្រាញននៀលបន្តទៀត ទោះជាលោក និងក្រុមគ្រួសារទទួលនូវផលមហាអវិជ្ជមានពីកាលៈទេសៈនេះយ៉ាងណាក៏ដោយ។ កញ្ញាបញ្ជាក់ថា នឹងប្ដេជ្ញាចិត្តមិនឱ្យការលះបង់របស់លោក កឹម សុខា ក្លាយជាអសារបង់ដាច់ខាត។
ប្រធានគណបក្សសង្គ្រោះជាតិលោក កឹម សុខា កើតនៅថ្ងៃទី២៧ ខែមិថុនា ឆ្នាំ១៩៥៣ ស្ថិតនៅឃុំឧត្ដមសូរិយា ស្រុកត្រាំកក់ ខេត្តតាកែវ ដែលគិតត្រឹមឆ្នាំ២០២៤ នេះ លោកមានជន្មាយុ ៧២ឆ្នាំហើយ។
នៅថ្ងៃទី២៧ ខែមិថុនា ឆ្នាំ២០២៤ នេះ សមាជិកគណបក្សសង្គ្រោះជាតិដែលគាំទ្រលោក កឹម សុខា បាននាំគ្នាបង្ហោះសារលើបណ្ដាញសង្គមហ្វេសប៊ុកជូនពរមេដឹកនាំដែលកំពុងជាប់ឃុំក្នុងផ្ទះរូបនេះព្រោងព្រាត។
ក្នុងសារទាំងនោះមានការរៀបរាប់ដោយបង្ហាញពីភាពកោតស្ញប់ស្ញែងនូវវីរភាពរបស់លោកដែលបានតស៊ូអត់ធ្មត់មិនរាថយ ក្នុងស្មារតីគោរពនូវឆន្ទៈរាស្ត្រ និងមិនរត់ចាកចោលពីកម្ពុជាដ៏កម្សត់ផងដែរ បើទោះបីជារូបលោកត្រូវប្រឈមនូវឧបសគ្គក្នុងបុព្វហេតុដើម្បីលទ្ធិប្រជាធិបតេយ្យ ការគោរពសិទ្ធិមនុស្ស និងសេរីភាពយុត្តិធម៌ពិតប្រាកដនៅកម្ពុជាក៏ដោយ។
លោក កឹម សុខា បានក្លាយជាមេដឹកនាំដែលពលរដ្ឋខ្មែរ និងសហគមន៍អន្តរជាតិទទួលស្គាល់ថាជាមេដឹកនាំមួយរូបដែលតំណាងឱ្យលទ្ធិប្រជាធិបតេយ្យ និងសិទ្ធិមនុស្សនៅកម្ពុជាសព្វថ្ងៃនេះ បើទោះបីជាលោកត្រូវបានរដ្ឋាភិបាលរបស់លោក ហ៊ុន សែន ចោទប្រកាន់ពីបទក្បត់ជាតិក៏ដោយ។
មេដឹកនាំបក្សប្រឆាំងលោក កឹម សុខា ត្រូវបានអាជ្ញាធរក្រុងភ្នំពេញចូលចាប់ខ្លួនដល់គេហដ្ឋានដោយគ្មានដីកាតុលាការ កាលពីយប់ថ្ងៃទី៣ ខែកញ្ញា ឆ្នាំ២០១៧ កន្លងទៅ ពីបទក្បត់ជាតិ ឬគប់គិតជាមួយរដ្ឋបរទេសផ្តួលរំលំរដ្ឋាភិបាលកម្ពុជាតាមប្រសាសន៍លោក ហ៊ុន សែន។
នៅថ្ងៃទី១០ ខែវិច្ឆិកា ឆ្នាំ២០១៩ តុលាការក្រុងភ្នំពេញបានចេញដីកាកែប្រែលក្ខខណ្ឌនៃការឃុំខ្លួនលោកសាជាថ្មី។ លក្ខខណ្ឌថ្មីនេះ តុលាការបានផ្តល់សេរីភាពដល់លោកច្រើនជាងមុន ប៉ុន្តែស្ថិតក្រោមការត្រួតពិនិត្យរបស់តុលាការដដែល ជាពិសេសហាមមិនឱ្យលោកធ្វើសកម្មភាពនយោបាយ និងហាមចេញទៅក្រៅបរទេសដាច់ខាត។
អំឡុងពេលដែលលោកមានសេរីភាពខ្លះៗ តុលាការនៅតែបន្តសវនាការលើសំណុំរឿងរបស់លោករហូតដល់ ៦៣លើក ប៉ុន្តែនៅថ្ងៃទី៣ ខែមីនា ឆ្នាំ២០២៤ ក្នុងសវនាការលើកទី៦៤ តុលាការបានប្រកាសសាលក្រមផ្ដន្ទាទោសលោក កឹម សុខា ពីបទក្បត់ជាតិតែម្តង ដោយសម្រេចឃុំខ្លួនក្នុងផ្ទះ ២៧ឆ្នាំ និងហាមជួបអ្នកដទៃក្រៅពីសាច់ជាតិក្នុងផ្ទះ រួមទាំងដកហូតសិទ្ធិនយោបាយថែមទៀត។
ក្រោយការប្រកាសសាលក្រមរបស់សាលាដំបូងរាជធានីភ្នំពេញ លោក កឹម សុខា បានប្តឹងទៅសាលាឧទ្ធរណ៍ ដើម្បីរកយុត្តិធម៌ក្នុងការកាត់សេចក្តីនេះ ខណៈសំណុំរឿងរបស់លោកនៅពេលនេះ ក៏កំពុងដំណើរការសវនាការនៅតុលាការថ្នាក់កណ្តាលបានចំនួន ១០លើកមកហើយដែរ។
សំណុំរឿងប្រធានគណបក្សសង្គ្រោះជាតិលោក កឹម សុខា ត្រូវបានគេចាត់ទុកថាជាសំណុំរឿងដែលយូរជាងគេក្នុងប្រវត្តិនៃការកាត់ក្តីនៅកម្ពុជា ដែលរងនូវការរិះគន់ថាជាសំណុំរឿងដែលស្ថិតក្នុងរបៀបវារៈនយោបាយ ជាជាងការស្វែងរកយុត្តិធម៌តាមប្រព័ន្ធតុលាការ ព្រោះសំណុំរឿងនេះបានបន្តសវនាការអស់ចំនួន ៧៣លើកហើយ បើគិតចាប់តាំងពីឆ្នាំ២០១៧ ដល់ឆ្នាំ២០២៤ នេះ។
ទាក់ទិននឹងបញ្ហានេះ កាលពីអំឡុងឆ្នាំ២០២៣ មេដឹកនាំបក្សកាន់អំណាចលោក ហ៊ុន សែន បានលើកឡើងថា លោក កឹម សុខា ជាប់គុកយូរដោយសារតែបរទេសស្រឡាញ់លោក កឹម សុខា ពេក។ ការលើកឡើងមិនចំឈ្មោះនេះ ត្រូវគេដឹងថាលោក ហ៊ុន សែន សំដៅដល់សហរដ្ឋអាមេរិកដែលតែងតែជួបលោក កឹម សុខា កន្លងមក៕