អ្នកតាមដានស្ថានការណ៍កម្ពុជា ចាត់ទុកការបន្ថែមបទចោទរបស់អយ្យការលើឃាតករ ស្រី ស៊ីណា គ្រាន់តែដើម្បីបន្សាបកំហឹងរបស់មហាជនដែលទាមទារឱ្យដាក់ឃាតកររូបនេះជាប់គុកអស់មួយជីវិតប៉ុណ្ណោះ។
អតីតមន្ត្រីសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី២៨ មិថុនា នេះថា បើផ្អែកលើការតាមដានជុំវិញករណីនេះ គឺអាចកត់សម្គាល់លើដំណើររឿងនេះនៅត្រង់ថា ឃាតកម្មនេះកើតឡើងក្រោយជម្លោះរវាងជនរងគ្រោះ និងអ្នកជិតខាងតាំងពី ៣ថ្ងៃមុនមកម្ល៉េះ ដូច្នេះវាបង្ហាញឲ្យឃើញថា ឃាតកម្មនេះមានភាគរយខ្ពស់ទៅរកអំពើឃាតកម្មគិតទុកជាមុន។
លោកបន្តថា តើគេអាចទិញកាំភ្លើងនោះនៅថ្ងៃបន្ទាប់ ក្រោយពេលមានជម្លោះរវាងជនរងគ្រោះ និងអ្នកជិតខាងដែរឬទេ ឬកាំភ្លើងនោះជាកាំភ្លើងដែលគេមានស្រាប់តាំងពីមុនមក ហើយតែងតែដាក់ជាប់ខ្លួនបែបនេះរហូតមក?
លោកអះអាងថា ចម្លើយជនល្មើសមានតែប៉ុន្មានម៉ាត់ដែលបានឆ្លើយនៅថ្ងៃចាប់ខ្លួនប៉ុណ្ណោះ ខណៈចម្លើយផ្សេងទៀតគ្មាននរណាបានដឹងទេថា គេបានឆ្លើយដូចម្តេច ដូចជាថារូបគេធ្វើដំណើរចេញមកពីផ្ទះទៅកាន់ផ្ទះជនរងគ្រោះដែលប្រដាប់ដោយកាំភ្លើងក្នុងគោលបំណងអ្វី?
អតីតមន្ត្រីសង្គមស៊ីវិលរូបនេះបញ្ជាក់ថា ទោះបីរដ្ឋមន្ត្រីក្រសួងយុត្តិធម៌ ព្យាយាមបកស្រាយថាអំពើឃាតកម្មនេះមិនបានគិតទុកជាមុនក៏ដោយ ក៏មហាជនមិនអាចទទួលយកបានដែរ ព្រោះពលរដ្ឋមិនមែនមិនចេះសិក្សាលើហេតុផលនោះទេ ទោះបីគាត់មិនមែនជាអ្នកច្បាប់ក៏ដោយ ក៏ហេតុផលនៃឃាតកម្មគិតទុកជាមុន មិនគិតទុកជាមុន គ្មានអ្វីដែលពិបាកយល់នោះទេ។
លោក ស៊ឹង សែនករុណា អះអាងថា បើការអនុវត្តច្បាប់លើជនទុច្ចរិតមិនបានត្រឹមត្រូវទេ នោះមានន័យថា ច្បាប់របស់កម្ពុជាគឺជាច្បាប់ដែលការពារជនខិលខូច និងដាក់ទោសលើជនស្លូតត្រង់ប៉ុណ្ណោះ ខណៈពលរដ្ឋដែលរំពឹងលើច្បាប់សម្រាប់ការពារយុត្តិធម៌ឱ្យពួកគេ ដូចសង្ឃឹមផ្កាយលើមេឃដូច្នោះដែរ។
កាលពីថ្ងៃទី២៧ ខែមិថុនា ឆ្នាំ២០២៤ សាលាដំបូងរាជធានីភ្នំពេញ បានចេញសេចក្តីប្រកាសព័ត៌មានស្ដីពីចំណាត់ការផ្លូវច្បាប់ ដោយសម្រេចចោទប្រកាន់លើជនសង្ស័យអតីតឧកញ៉ា ស្រី ស៊ីណា ពីបទ រំលោភលំនៅឋាន តាមមាត្រា២៩៩ នៃក្រមព្រហ្មទណ្ឌ ដែលនឹងត្រូវផ្ដន្ទាទោសដាក់ពន្ធនាគារពី ១ខែទៅ ១ឆ្នាំបន្ថែមមួយករណីទៀត។
កាលពីថ្ងៃទី១៧ ខែមិថុនា ឆ្នាំ២០២៤ ជនដៃដល់ឈ្មោះ ស្រី ស៊ីណា បានបាញ់សម្លាប់គូដណ្ដឹងមួយគូដល់ក្នុងផ្ទះ និងបង្ករបួសស្នាមដល់ជនរងគ្រោះ ២នាក់ផ្សេងទៀតផងដែរ។
ជុំវិញអំពើឃាតកម្មនេះ អយ្យការអមសាលាដំបូងបានសម្រេចចោទប្រកាន់ ៣ករណី គឺបទឃាតកម្ម, បទប៉ុនប៉ងឃាតកម្ម និងបទប្រើប្រាស់អាវុធខុសច្បាប់ ហើយករណីនេះត្រូវបានបំបែកដល់ទៅជា ២សំណុំរឿងឯណោះ។
ការបំបែកជាពីរសំណុំរឿងបែបនេះ គឺត្រូវកំណត់ឱ្យឃាតករជាប់ពន្ធនាគាររយៈពេល ៣០ឆ្នាំពេញ ដែលត្រូវអនុវត្តទោសក្នុងពន្ធនាគារ ១៥ឆ្នាំម្តងក្នុង ១សំណុំរឿង ខណៈបទចោទថ្មីនេះអាចនឹងត្រូវបន្ថែមទោស ១ឆ្នាំទៀត ដែលគិតជាសរុប គឺត្រូវកើនឡើងដល់ ៣១ឆ្នាំ ស្របពេលដែលឃាតកររូបនេះមានអាយុ ៥០ឆ្នាំទៅហើយនោះ។
កាលពីថ្ងៃទី២៦ ខែមិថុនា ឆ្នាំ២០២៤ ក្នុងសន្និសីទសារព័ត៌មាន រដ្ឋមន្ត្រីក្រសួងយុត្តិធម៌ លោក កើត រិទ្ធ លើកឡើងថា បើទោះបីជាអតីតឧកញ៉ា ស្រី ស៊ីណា មិនត្រូវបានចោទប្រកាន់ពីបទឃាតកម្មគិតទុកជាមុន ដែលត្រូវដាក់គុកមួយជីវិតព្រោះតែគ្មានធាតុផ្សំគ្រប់គ្រាន់ក៏ដោយ ក៏សំណុំរឿងនេះនៅតែអាចចោទប្រកាន់ពីបទ ឃាតកម្មគិតទុកជាមុន នៅពេលក្រោយបានដដែល ប្រសិនបើមានភស្តុតាងណាមួយដែលបង្ហាញពីធាតុផ្សំគ្រប់គ្រាន់នោះ។
លោក កើត រិទ្ធ លើកឡើងថា ការអនុវត្តទោសក្នុងពន្ធនាគារ ៣០ឆ្នាំរបស់ឃាតកររូបនេះ នឹងមិនត្រូវបានដាក់បញ្ចូលក្នុងបញ្ជីបន្ធូរបន្ថយទោសដាច់ខាត ហើយបើឃាតកររូបនេះមិនត្រូវបានអនុវត្តទោសពេញលេញតាមច្បាប់ទេ លោកសុខចិត្តចុះចេញពីតំណែង និងដកខ្លួនចេញពីពិភពច្បាប់ថែមទៀត។
មាត្រា១៩៩ នៃក្រមព្រហ្មទណ្ឌ ចែងថា អំពើសម្លាប់មនុស្សដោយចេតនា ដោយប្រើអាវុធ ឬមិនប្រើអាវុធ ត្រូវផ្ដន្ទាទោសដាក់ពន្ធនាគារពី ១០ឆ្នាំទៅ ១៥ឆ្នាំ។ ចំណែកមាត្រា២០០ នៃក្រមព្រហ្មទណ្ឌ ចែងថា ឃាតកម្មគិតទុកជាមុន គឺជាអំពើសម្លាប់មនុស្សដោយគិតទុកជាមុន ត្រូវផ្ដន្ទាទោសដាក់ពន្ធនាគារអស់មួយជីវិត។
កាលពីអំឡុងឆ្នាំ២០១៤ ឧកញ៉ា ថោង សារ៉ាត់ ដែលបានរងការចោទប្រកាន់ថាបានបាញ់សម្លាប់ឧកញ៉ា អ៊ឹង ម៉េងជឺ ត្រូវបានតុលាការកាត់ទោសឱ្យជាប់ពន្ធនាគារអស់មួយជីវិត ប៉ុន្តែនៅអំឡុងឆ្នាំ២០២០ ឧកញ៉ារូបនេះក៏ត្រូវបានតុលាការដោះលែងឱ្យមានសេរីភាពឡើងវិញ៕