អង្គការសង្គមស៊ីវិល និងសមាគមន៍ជិត ៥០ស្ថាប័ន ទាមទារឱ្យបញ្ឈប់ការធ្វើទុក្ខបុកម្នេញទៅលើអង្គការសង់ត្រាល់ ពាក់ព័ន្ធនឹងរបាយការណ៍រោងចក្រកាន់តែប្រសើរនូវសេរីភាពរបស់សហជីពសម្រាប់កម្មករ និងសហជីពនៅកម្ពុជា បន្ទាប់ពីក្រុមសហជីពដែលគាំទ្ររដ្ឋាភិបាល និងថៅកែរោងចក្រ បានប្ដឹងអ្នកគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ ពីបទ បរិហារកេរ្តិ៍ជាសាធារណៈ និងបទញុះញង់ឱ្យមានការរើសអើង។
ក្នុងសេចក្ដីថ្លែងការណ៍របស់អង្គការសង្គមស៊ីវិល និងសមាគមចំនួន ៤៣ស្ថាប័ន នៅថ្ងៃទី២៧ ខែមិថុនា ឱ្យដឹងថា ការសម្រេចចិត្តរបស់ក្រសួងមហាផ្ទៃ ក្នុងការពិនិត្យមើលទៅលើញត្តិដែលបានទទួល និងមើលអំពីលទ្ធភាពដែលអាចធ្វើការស៊ើបអង្កេតលើអង្គការសង់ត្រាល់ ពាក់ព័ន្ធនឹងការចេញផ្សាយរបាយការណ៍របស់ស្ថាប័ននេះ គឺជាការឆ្លើយតបបែបអវិជ្ជមាន និងជាការព្យាយាមបំភិតបំភ័យទៅលើអង្គការមិនមែនរដ្ឋាភិបាល។
ប្រភពដដែលអះអាងថា ពួកគេក៏មិនយល់ស្របចំពោះការអំពាវនាវដល់ក្រសួងពាក់ព័ន្ធ ឱ្យមានការស៊ើបអង្កេតទៅលើការផ្តល់ជំនួយហិរញ្ញវត្ថុ និងដំណើរការសកម្មភាពការងាររបស់អង្គការសង់ត្រាល់ ដោយយកមូលហេតុមិនត្រឹមត្រូវស្ដីពីការជ្រៀតជ្រែក និងការគ្រប់គ្រងរបស់រដ្ឋបរទេសលើសង្គមស៊ីវិលនៅកម្ពុជា។
ក្នុងសេចក្ដីថ្លែងការណ៍របស់អង្គការសង្គមស៊ីវិលដដែល បានលើកឡើងថា ក្រៅពីការតវ៉ា និងការស្នើទៅក្រសួងនោះ សហភាពសហជីពរក្សាសិទ្ធិកម្មករកម្ពុជាដែលជាសហជីពគាំទ្ររដ្ឋាភិបាល និងថៅកែរោងចក្រ លោក ហង្ស រ៉ាវី នៅថ្ងៃទី២៧ ខែមិថុនា ក៏បានដាក់ពាក្យបណ្ដឹងទៅកាន់តុលាការ ប្ដឹងអ្នកគ្រប់គ្រងកម្មវិធីការងារនៃអង្គការសង់ត្រាល់ គឺលោក ឃុន ថារ៉ូ ដោយចោទពីបទបរិហារកេរ្តិ៍ជាសាធារណៈ និងបទញុះញង់ឱ្យមានការរើសអើង ពាក់ព័ន្ធនឹងការលើកឡើងរបស់លោក ឃុន ថារ៉ូ ជុំវិញការវាយប្រហារមកលើការងាររបស់ក្រុមសហជីពឯករាជ្យ។
ក្រុមអង្គការសង្គមស៊ីវិល និងសមាគមទាំង ៤៣ស្ថាប័ន អំពាវនាវដល់រដ្ឋាភិបាលឱ្យរក្សាជំហរ និងការប្ដេជ្ញាចិត្តរបស់ខ្លួនក្នុងការគោរពនូវសេរីភាពក្នុងការបញ្ចេញមតិ និងអនុញ្ញាតឱ្យអង្គការមិនមែនរដ្ឋាភិបាលទាំងអស់ អាចធ្វើការងាររបស់ខ្លួនដោយសេរី ជៀសផុតពីការរំលោភបំពាន និងការឆ្លើយតបជាអវិជ្ជមានដោយគ្រាន់តែស្ថាប័នទាំងនោះធ្វើការរិះគន់។
ជុំវិញរឿងនេះ អង្គការអន្តរជាតិឈ្មោះ យុទ្ធនាការសម្លៀកបំពាក់ស្អាតនៃក្រុមសហជីពអន្តរជាតិ បានថ្កោលទោស និងហៅសកម្មភាពក្រុមសហជីពគាំទ្ររដ្ឋាភិបាល និងថៅកែរោងចក្រ ថាជាយុទ្ធនាការលាបពណ៌ប្រឆាំងអង្គការការពារសិទ្ធិមនុស្សឯករាជ្យនៅកម្ពុជា។
អង្គការយុទ្ធនាការសម្លៀកបំពាក់ស្អាត បញ្ជាក់ថា អង្គការរបស់ខ្លួនគាំទ្រ និងឈរក្នុងសាមគ្គីភាពរឹងមាំជាមួយសង់ត្រាល់ ដើម្បីតស៊ូទល់នឹងការចោទប្រកាន់មិនពិតរបស់ក្រុមសហជីពដែលគាំទ្ររដ្ឋាភិបាល និងថៅកែរោងចក្រ៕