អ្នកសង្កេតការណ៍ចាត់ទុកចំណាត់ការរបស់ក្រសួងមហាផ្ទៃ ទៅលើអង្គការសង់ត្រាល់ ថាបានបង្កប់នូវចរិតនយោបាយក្នុងបំណងបោសសម្អាតអង្គការក្រៅរដ្ឋាភិបាលឯករាជ្យ ដើម្បីកុំឱ្យធ្វើជាឆ្អឹងទទឹងកទៅថ្ងៃមុខ។
អនុប្រធានវេទិកាពលរដ្ឋលោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១ កក្កដា នេះថា ការកំណត់ឱ្យមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ក្នុងការផ្តល់ព័ត៌មានពីគណនីរបស់ស្ថាប័នមួយនេះដែលបានបើកសម្រាប់ប្រតិបត្តិការនៅធនាគារនៅកម្ពុជា ទៅឲ្យក្រសួងមហាផ្ទៃ គឺបង្ហាញយ៉ាងច្បាស់ពីចេតនាក្នុងការកម្ទេចអង្គការក្រៅរដ្ឋាភិបាលមួយនេះកុំឱ្យធ្វើសកម្មភាពជួយសហជីព និងកម្មកររងគ្រោះបន្តទៀត។
លោកបញ្ជាក់ថា ករណីដែលក្រសួងមហាផ្ទៃ តម្រូវឱ្យសង់ត្រាល់បង្ហាញពីព័ត៌មានគណនីធនាគារ លុះត្រាតែមានជម្លោះក្នុងស្ថាប័ននេះជុំវិញអំពើពុករលួយ រហូតមានការប្តឹងផ្តល់ពីសមាជិកផ្ទៃក្នុង ប៉ុន្តែករណីនេះ ក្រសួងមហាផ្ទៃអនុវត្តច្បាប់ដោយចាប់បង្ខំ និងមិនសមហេតុផលទាល់តែសោះ។
លោក ម៉ែន ណាត បញ្ជាក់ថា វិធានការបោសសម្អាតអ្នកដែលប្រឆាំងនឹងបក្សកាន់អំណាចរបស់លោក ហ៊ុន សែន កំពុងដើរដល់ដំណាក់កាលចុងក្រោយ គឺការបោសសម្អាតសង្គមស៊ីវិល បន្ទាប់ពីបោសសម្អាតបក្សនយោបាយ និងសារព័ត៌មានឯករាជ្យវីអូឌី ដែលសេសសល់ចុងក្រោយនៅកម្ពុជា កាលពីដើមឆ្នាំ២០២៣ កន្លងទៅនោះ ដូច្នេះករណីនេះ គឺជាល្បិចនយោបាយសុទ្ធសាធ។
កាលពីថ្ងៃទី២៨ ខែមិថុនា ឆ្នាំ២០២៤ រដ្ឋមន្ត្រីក្រសួងមហាផ្ទៃ លោក ស សុខា បានចេញលិខិតមួយទៅកាន់ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា ឱ្យផ្តល់ព័ត៌មានពីគណនីដែលបានបើកសម្រាប់ប្រតិបត្តិការនៅធនាគារក្នុងប្រទេសកម្ពុជា ទៅឱ្យក្រសួងមហាផ្ទៃ ជាកំហិត។
ក្រសួងមហាផ្ទៃ បញ្ជាក់ថា សង់ត្រាល់មានរយៈពេលត្រឹមតែ ៣០ថ្ងៃប៉ុណ្ណោះចាប់ពីថ្ងៃជូនដំណឹងនេះ ដើម្បីធ្វើរបាយការណ៍ ប៉ុន្តែបើមិនអនុវត្តតាមការណែនាំទេ ក្រសួងនឹងចាត់វិធានការច្បាប់ទៅតាមច្បាប់ស្ដីពីសមាគម និងអង្គការមិនមែនរដ្ឋាភិបាលជាធរមាន។
ទោះជាយ៉ាងណាក៏ដោយ អង្គការក្រៅរដ្ឋាភិបាលជាង ៤០ស្ថាប័ន (៤៤ស្ថាប័ន) បានចេញសេចក្តីថ្លែងការណ៍រួមគ្នាកាលពីថ្ងៃទី២៩ ខែមិថុនា ថា ការសម្រេចចិត្តរបស់ក្រសួងមហាផ្ទៃ ក្នុងការចាត់វិធានការលើអង្គការសង់ត្រាល់ គឺជាការព្យាយាមបំភិតបំភ័យទៅលើអង្គការក្រៅរដ្ឋាភិបាលដែលកំពុងតស៊ូមតិដើម្បីសេរីភាពរបស់សហជីព និងកម្មករនៅកម្ពុជា៕